ପୁରୁଣା ସ୍ମୃତି,ମୋ ଅନୁଭୂତି

ଜଗମୋହନ ପଟ୍ଟନାୟକ

ପୁଣି ଫେରନ୍ତା କି ସେ ପୁରୁଣା ଦିନ

ପୁଣି ଆଜି ଚାଟଶାଳୀରେ ମନ

ଦଶ ପଇସାରେ ଅଡାଏ ମୁଢ଼ି

ପାଞ୍ଚ ପଇସାରେ ଗୋଟେ କାକୁଡି

ବିଦ୍ୟାଳୟେ ଆମେ କରିଛୁ ମଜା

କେତେ ମକା ସିଝା ନଡ଼ିଆ ଖଜା

ଗହମ ଉପମା ଖାଇଛ କେବେ

ମନରେ ଉତ୍କଣ୍ଠା ଖାଇବି ଏବେ

ମକାଗୁଣ୍ଡ ଖିରି ଆହା କି ମିଠା

ଏବେ ସେଗୁଡ଼ାକ ଲାଗୁଛି ସିଠା

ଗୁରୁଜନଙ୍କର ସ୍ନେହ ଆଶିଷ

ଶିକ୍ଷାଦାନ ପୁଣି ଭାରି ସରସ

ପଢ଼ାରେ ଯେ ଠକେ ମାଡ଼ ଖାଇଛି

କନିଅର ଛାଟ ଛିଣ୍ଡି ଯାଇଛି

ଯୁକ୍ତାକ୍ଷର ପଣିକିଆ ମିଶାଣ

ଲସାଗୁ ଗସାଗୁ ପୁଣି ଗୁଣନ

ମଧୁ ବର୍ଣ୍ଣବୋଧ ପୁରୁଣା ହେଲା

ସାହିତ୍ୟ ପାଠର ଅସ୍ତିତ୍ୱ ଗଲା

ଡିବିରି ଲଗାଇ ପାଠ ପଢିଛୁ

କ୍ଷେତ ଖଳା ଯାଇ କାମ କରିଛୁ

ପଖାଳ ଭାତକୁ ନାଲି ପିଆଜ

କେବେ ଆଳୁ ସିଝା ସାଥିରେ ସଜ

ତଥାପି ନଥିଲା ମନରେ ଦୁଃଖ

ଝଡ଼ ଝଞ୍ଜା ଭୁଲି ପାଇଛୁ ସୁଖ

ମାଁ ଯାହା ଦେଲା ପାଇ ହରସେ

ଅଝଟ ହୋଇନୁ କେବେ ତା ପାସେ

ବାଟି ନଟୁ ପୁଚି କବାଡି ଖେଳ

ବହୁରୂପୀ ଝୋଟି ସବୁରେ ମୂଳ

ଫୁଟବଲ କ୍ରିକେଟ ଉନ୍ନତ ଥିଲା

ଖେଳାଳିଙ୍କ ଠାରେ ଶୃଙ୍ଖଳା ଥିଲା

ନୃତ୍ୟ ନାଟକ ଗାଁ ଆଖଡା ଥିଲା

ସବୁ ଆଜି ଅବସାନ ହୋଇଲା

ସବୁ ଜାତି ଧର୍ମେ ଥିଲା ପୀରତି

ସାମ୍ପ୍ରଦାୟିକତା ଏବେ ଥରାଏ ଛାତି

ପୁରୁବ ଗୌରବ ପୁରୁଣା ଦିନ

ଯେତେ ଲେଖୁଥିଲେ ବୁଝେନି ମନ

ହେ ଗୁଣିଜନ କିମ୍ପା ହୁଅ ଅଜ୍ଞାନ

ଇତିହାସ ଦେଖ ମିଳିବ ଜ୍ଞାନ ।

ଜଗମୋହନ ପଟ୍ଟନାୟକ

ବରିଷ୍ଠ ପତ୍ରକାର, ସମାଜସେବୀ