ଜିଲ୍ଲାପାଳଙ୍କୁ ଭାବବିହ୍ୱଳ ବିଦାୟ କାଳୀନ ସମ୍ବର୍ଦ୍ଧନା
କେନ୍ଦ୍ରାପଡ଼ା, ୨୭/୦୧: ଆଶଙ୍କା ସହ ଆସିଥିଲି କିନ୍ତୁ ଯାଉଛି ଆଶୀର୍ବାଦ ନେଇ । ଜିଲ୍ଲାପାଳ ଭାବେ ଆସିଥିଲି କିନ୍ତୁ ଯାଉଛି କବିଟିଏର ପରିଚୟ ନେଇ । କେନ୍ଦ୍ରାପଡ଼ାର ସ୍ୱର୍ଣ୍ଣିମ ସ୍ମୃତି ମୋ ପ୍ରଫେସନାଲ୍ କ୍ୟାରିୟର୍ରେ ଚିରକାଳ ଝଟକୁଥିବ ବୋଲି ବିଦାୟକାଳୀନ ସ୍ମୃତିସଭାରେ ଯୋଗ ଦେଇ କହିଛନ୍ତି ଜିଲ୍ଲାପାଳ ଶ୍ରୀ ଅମ୍ରିତ୍ ଋତୁରାଜ । ଜିଲ୍ଲା ପ୍ରଶାସନିକ ଅଧିକାରୀ ଓ କଲେକ୍ଟୋରେଟ୍ ଷ୍ଟାଫ୍ କମିଟି 
ପକ୍ଷରୁ ଜିଲ୍ଲାପାଳଙ୍କ ସଦ୍ଭାବନା ସଭାଗୃହରେ ଅତିରିକ୍ତ ଜିଲ୍ଲାପାଳ (ରାଜସ୍ୱ) ଶ୍ରୀ ନିଲୁ ମହାପାତ୍ରଙ୍କ ଅଧ୍ୟକ୍ଷତାରେ ଏକ ଭାବବିହ୍ୱଳ ବିଦାୟକାଳୀନ ସମ୍ବର୍ଦ୍ଧନା ସଭା ଅନୁଷ୍ଠିତ ହୋଇଯାଇଛି । ଶ୍ରୀ ଋତୁରାଜ ୮/୧/୨୦୨୧ରେ କେନ୍ଦ୍ରାପଡ଼ାରେ ଜିଲ୍ଲାପାଳ ଭାବେ ଯୋଗ ଦେଇଥିଲେ । ଜିଲ୍ଲାସ୍ତରୀୟ ଅଧିକାରୀ ଏବଂ କଲେକ୍ଟୋରେଟ୍ ଷ୍ଟାଫ୍ କମିଟିର କର୍ମକର୍ତା ମାନେ ଜିଲ୍ଲାପାଳଙ୍କ ସହ କାଟିଥିବା ମଧୁର ସ୍ମୃତିର ଅବତାରଣା କରୁ କରୁ ଭାବବିହ୍ୱଳ ହୋଇ ପଡ଼ିଥିଲେ । କେବଳ ଜଣେ ବିଚକ୍ଷଣ ପ୍ରଶାସକ ନୁହେଁ ବରଂ ଜଣେ ବିବେକୀ, ଦରଦୀ ମଣିଷ ଭାବେ ତାଙ୍କର ସୁନାମ ରହିଛି ବୋଲ ଉପସ୍ଥିତ କର୍ମକର୍ତା ଓ ପ୍ରଶାସନିକ ଅଧିକାରୀମାନେ କହିଥିଲେ ।
ତାଙ୍କ କାର୍ଯ୍ୟକାଳରେ ଲ୍ୟାଣ୍ଡ୍ ଡିଜିଟାଲାଇଜେସନ୍ ଯୋଗୁଁ କେନ୍ଦ୍ରାପଡ଼ା ଜିଲ୍ଲା ‘ଭୂମି ସମ୍ମାନ’ରେ ସମ୍ମାନୀତ ହୋଇ ଭାରତର ମହାମହିମ ରାଷ୍ଟ୍ରପତିଙ୍କଠାରୁ ପୁରସ୍କାର ଗ୍ରହଣ କରିଛି । ଭିନ୍ନକ୍ଷମ ସଶକ୍ତିକରଣ ବର୍ଗରେ ରାଜ୍ୟରେ ପ୍ରଥମ ସ୍ଥାନ ଅଧିକାର କରିଛି କେନ୍ଦ୍ରାପଡ଼ା । ସୁକନ୍ୟା ସମୃଦ୍ଧି ଯୋଜନାରେ ସର୍ବାଧିକ ଝିଅଙ୍କ ନାମରେ ବ୍ୟାଙ୍କ ଖାତା ଖୋଲି ପୁରସ୍କୃତ ହୋଇଛି । ପୁରୁଣା ମେଡିକାଲ୍ ପରିସରରେ ଗଢ଼ିଉଠିଛି “ଭିନ୍ନକ୍ଷମ ଥଇଥାନ କେନ୍ଦ୍ର” ଯାହାକି ଦିବ୍ୟାଙ୍ଗମାନଙ୍କ ଜୀବନରେ ଆଣିପାରିବ ବୈପ୍ଲବିକ ପରିବର୍ତ୍ତନ । ଜିଲ୍ଲାର ମା’ ଭଉଣୀ ମାନଙ୍କୁ ସଶକ୍ତ କରିବା ପାଇଁ ୨୦୨୩-୨୪ ଆର୍ଥିକ ବର୍ଷରେ ୭୦୦କୋଟିର ବ୍ୟାଙ୍କ ଋଣ ମିଶନ ଶକ୍ତି ଜରିଆରେ ପ୍ରଦାନ କରାଯାଇଛି । ସିକିମ୍ ସତ୍ୱ ଜମି ସମସ୍ୟାର ସ୍ଥାୟୀ ସମାଧାନ ପାଇଁ କେନ୍ଦ୍ରାପଡ଼ା ଜିଲ୍ଲା ପ୍ରଶାସନ ସାଜିଛି ପଥ ପ୍ରଦର୍ଶକ । ତାଙ୍କ ଦୂରଦୃଷ୍ଟି ଓ ପ୍ରଶାସନିକ ବିଚକ୍ଷଣତା ଯୋଗୁଁ ଶିଳ୍ପବିହୀନ କେନ୍ଦ୍ରାପଡ଼ା ଜିଲ୍ଲାର ମହାକାଳପଡ଼ାଠାରେ ପ୍ରତିଷ୍ଠା ହେବାକୁ ଯାଉଛି ବୃହତ ଇସ୍ପାତ୍ ଶିଳ୍ପ । ବଗପାଟିଆ ଠାରେ ଏକ ଥଇଥାନ କେନ୍ଦ୍ର ପ୍ରତିଷ୍ଠା ହୋଇପାରିଛି ବିସ୍ଥାପିତ ଜନସାଧାରଣଙ୍କ ପାଇଁ । ଉନ୍ନତ ସ୍ୱାସ୍ଥ୍ୟସେବା ଯୋଗାଇ ଦେବା ପାଇଁ ଇଛାପୁର ନିକଟରେ ପ୍ରତିଷ୍ଠା ହୋଇଛି ନୂତନ ମେଡିକାଲ କ୍ୟାମ୍ପସ୍ । ତାଙ୍କ ସମୟରେ ଜିଲ୍ଲା ସଂସ୍କୃତି ଭବନ କାର୍ଯ୍ୟକାରୀ ହୋଇପାରିଛି ।
ଏହି ବିଦାୟକାଳୀନ ସମ୍ବର୍ଦ୍ଧନା ସଭାରେ ଅତିରିକ୍ତ ଜିଲ୍ଲାପାଳ (ସାଧାରଣ) ଶ୍ରୀ ପୀତାମ୍ବର ସାମଲ, ଜିଲ୍ଲା ପରିଷଦର ମୁଖ୍ୟ ଉନ୍ନୟନ ଅଧିକାରୀ ତଥା ନିର୍ବାହୀ ଅଧିକାରୀ ରାଜେନ୍ଦ୍ର କୁମାର ପଣ୍ଡା, ଉପଜିଲ୍ଲାପାଳ ରବିନ୍ଦ୍ର କୁମାର ପ୍ରଧାନ, ଡେପୁଟି କଲେକ୍ଟର, ବିଭିନ୍ନ ତହସିଲ୍ ଓ ବ୍ଲକ୍ର ତହସିଲଦାର ଓ ବିଡିଓ, ବିଭିନ୍ନ ବିଭାଗର ଜିଲ୍ଲାସ୍ତରୀୟ ଅଧିକାରୀ, ବିଭିନ୍ନ ଲାଇନ ଡିପାର୍ଟମେଂଟର ନିର୍ବାହୀ ଯନ୍ତ୍ରୀ, କଲେକ୍ଟୋରେଟ୍ ଷ୍ଟାଫ୍ କମିଟିର କର୍ମକର୍ତ୍ତା ପ୍ରମୁଖ ଉପସ୍ଥିତ ଥିଲେ ।
କେନ୍ଦ୍ରାପଡ଼ା ରୁ ସମୀର କୁମାର ପ୍ରଧାନ ଙ୍କ ରିପୋର୍ଟ ମସିହା ନିୟୁଜ!!!
