ପଞ୍ଚାୟତ ଅଧିନ ସମସ୍ତ ସରକାରୀ ବିଦ୍ୟାଳୟର ପ୍ରଧାନ ଶିକ୍ଷକଙ୍କ ସହ ସ୍କୁଲ୍ ସମସ୍ୟା ଓ ସମାଧାନ ପାଇଁ କଲେ ବୈଠକ
ରୁପ୍ରା, (ମନିସ): ନର୍ଲା ବ୍ଲକ ଅଧିନ ଗିଗିନା ଗ୍ରାମ ପଞ୍ଚାୟତର ନବ ନିର୍ବାଚିତ ସରପଞ୍ଚ ସୂଧାମୟୀ କୁମାର ନିଜ ଦାୟିତ୍ୱ ଗ୍ରହଣ କରିବା ପରେ ପଞ୍ଚାୟାତ କାର୍ଯ୍ୟାଳୟକୁ ଆସି ସମସ୍ତ ବିଷୟ ଉପରେ ତର୍ଜମା କରିବା ଓ ପିଇଓ ଶନିଶ୍ଚର ସୁରଜଙ୍କ ସହ ପଞ୍ଚାୟତ ବାବଦରେ ବିଭିନ୍ନ ପ୍ରସଙ୍ଗ ଉପରେ ଆଲୋଚନା କରିବା ସହ ନିଜ କାର୍ଯ୍ୟ ଦକ୍ଷତାର ପ୍ରମାଣ ଦେଖାଇଛନ୍ତି । 
ସରପଞ୍ଚ ସୂଧାମୟୀ କୁମାର ଜଣେ ଉଚ୍ଚ ଶିକ୍ଷିତା ହୋଇଥିବା ସହ ବର୍ତ୍ତମାନ ନର୍ଲା ସରପଞ୍ଚ ସଂଘର ସମ୍ପାଦିକା ଭାବରେ ମଧ୍ୟ ସର୍ବ ସମ୍ମତ କ୍ରମେ ମନୋନୀତ ହୋଇଛନ୍ତି । ବିଶେଷକରି ପ୍ରାଥମିକ ଶିକ୍ଷା ଓ ସ୍ୱାସ୍ଥ୍ୟକୁ ବିଶେଷ ଗୁରୁତ୍ୱ ଦେଉଥିବା ବେଳେ ପ୍ରଥମ ପଦକ୍ଷେପ ସ୍ୱରୁପ ପଞ୍ଚାୟତ ଅଧିନ ସମସ୍ତ ସରକାରୀ ବିଦ୍ୟାଳୟର ପ୍ରଧାନ ଶିକ୍ଷକ ମାନଙ୍କ ସହ ସ୍କୁଲ୍ ସମସ୍ୟା ଓ ସମାଧାନ ବାବଦରେ ଆଲୋଚନା କରିଥିଲେ । ଆଜିର ଏହି ଆଲୋଚନା ସଭା ସରପଞ୍ଚ ସୂଧାମୟୀ ଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିବା ବେଳେ ପିଇଓ ଶନିଶ୍ଚର ସୂରଜ, ଗ୍ରାମ ରୋଜଗାର ସେବକ ଜୈପାଳ ନାଗ ଓ ଯୋଗାଣ ସହାୟକ ସୁଶୀଲ ବାଗ୍ ପ୍ରମୁଖ ଉପସ୍ଥିତ ରହି ସହଯୋଗ କରିଥିଲେ ।
ଯୋଡାବନ୍ଧ ୟୁଜିଏଚ୍ ର ପ୍ରଧାନ ଶିକ୍ଷକ ରବିନ୍ଦ୍ର କୁମାର ସାହୂ, ଗିଗିନା ୟୁପିଏସ୍ ର ପ୍ରଧାନ ଶିକ୍ଷକ ଜନ୍ମେଜୟ ସେନାପତି, ଟାପରାଙ୍ଗ୍ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ଗଣେଶ ଚନ୍ଦ୍ର ସାହୁ, ଭଟାଖମାର ପିଏସ୍ ର ପ୍ରଧାନ ଶିକ୍ଷକ ସୁରେଶ ଚନ୍ଦ୍ର ସାହୂ, ୟୁପିଏସ୍ ସିନାଙ୍ଗ ପ୍ରଧାନ ଶିକ୍ଷକ ଭୁଜ କୁମାର, ନାଏକପଡା ବିଦ୍ୟାଳୟର କିଶନେଶ୍ୱରୀ ମାଝୀ, ଶ୍ରୀପୁର୍ ୟୁପିଏସ୍ ର ପ୍ରଧାନ ଶିକ୍ଷକ ମୋହନ କୁମାର ସାହୁ, ଡମପଦର ପିଏସ୍ ର ପ୍ରଧାନ ଶିକ୍ଷକ ଲକ୍ଷ୍ମଣ ନାଏକ ପ୍ରମୁଖ ଯୋଗଦାନ କରି ବିଦ୍ୟାଳୟର ସମସ୍ତ ସମସ୍ୟା ଓ ସମାଧାନ ବାବଦରେ ନବ ନିର୍ବାଚିତ ସରପଞ୍ଚଙ୍କ ସହ ଆଲୋଚନା କରିଥିଲେ । 
ଏହା ବ୍ୟତିତ ପଞ୍ଚାୟତ ଅଧିନ ଉଭୟ ପୁରୁଷ ଓ ମହିଳା ସ୍ୱାସ୍ଥ୍ୟକର୍ମୀଙ୍କୁ ଡାକି ସ୍ୱାସ୍ଥ୍ୟ ସମନ୍ଧରେ ଆଲୋଚନା କରିଥିଲେ । ସରପଞ୍ଚଙ୍କ ଏହି ଭଳିଆ କାର୍ଯ୍ୟକ୍ରମକୁ ଜନସାଧାରଣ ପ୍ରସଂଶା କରୁଥିବା ବେଳେ ନିଜ ପ୍ରତିକ୍ରିୟାରେ ସରପଞ୍ଚ ସୂଧାମୟୀ କୁମାର କହିଛନ୍ତି ଗିଗିନା ଗ୍ରାମ ପଞ୍ଚାୟତକୁ ଏକ ଆଦର୍ଶ ଗ୍ରାମ ପଞ୍ଚାୟତ ଗଠନ କରିବା ହେଉଛି ମୋର ସ୍ୱପ୍ନ ଓ ଏହା ମୋର କାର୍ଯ୍ୟକାଳ ଭିତରେ କରିବି, ଏଥିପାଇଁ ସମସ୍ତଙ୍କ ସହଯୋଗ କାମନା କରିଛନ୍ତି । ରୁପ୍ରା ରୁ ପ୍ରଦୀପ ସେନାପତି ଙ୍କ ରିପୋର୍ଟ ।
