ଶ୍ରୀମଦ୍ ଗୀତାର ନବମ ଅଧ୍ଯାୟର ସାରକଥା-୯
ଭଗବାନ୍ ଅର୍ଜୁନଙ୍କୁ କହିଲେ-ଅତ୍ଯନ୍ତ ଗୋପନୀୟ ଓ ସର୍ବଶ୍ରେଷ୍ଠ ଜ୍ଞାନ ବିଜ୍ଞାନ ତୁମକୁ କହିବି । ତାହା ଜାଣିପାରିଲେ ତୁମେ ସଂସାର ବନ୍ଧନରୁ ମୁକ୍ତ ହେବ । ଏହି ଜ୍ଞାନ ବିଜ୍ଞାନକୁ ଭଗବାନ୍ ନିଜେ ରାଜବିଦ୍ଯା (ଶ୍ରେଷ୍ଠବିଦ୍ଯା) ରାଜଗୁହ୍ଯ(ଅତ୍ୟନ୍ତ ଗୋପନୀୟ) କହିଥିବାରୁ ଏ ଅଧ୍ଯାୟର ନାମ ରାଜବିଦ୍ଯା ରାଜଗୁହ୍ଯ ଯୋଗ ଅଟେ । ଭଗବାନ ସମସ୍ତ ଜଗତରେ ବ୍ଯାପି ରହିଅଛନ୍ତି ଏବଂ ଜଗତର ସମସ୍ତ ଜୀବ ଓ ପଦାର୍ଥ ତାଙ୍କଠାରେ ଅବସ୍ଥିତ । ପୁଣି ଜୀବମାନେ ମଧ୍ଯ ତାଙ୍କଠାରେ ଅବସ୍ଥିତ ନୁହନ୍ତି । ପ୍ରଳୟ ସମୟରେ ସମସ୍ତଭୂତ ଭଗବାନଙ୍କ ଠାରେ ଲୀନ ହୁଅନ୍ତି ଓ ସୃଷ୍ଟି ଆରମ୍ଭରେ ପୁଣି ସେମାନେ ଜନ୍ମଲାଭ କରନ୍ତି । ଭଗବାନଙ୍କ ଅଧ୍ଯକ୍ଷତାରେ ପ୍ରକୃତି ସୃଷ୍ଟି ଓ ପ୍ରଳୟ କରିଥାଏ,ମାତ୍ର ନିଜେ ଭଗବାନ ଏ ସବୁ କର୍ମରେ ସମ୍ପୂର୍ଣ୍ଣ ନିର୍ଲିପ୍ତ ।
ମୋହଗ୍ରସ୍ତ ବ୍ଯକ୍ତିମାନେ ଅବ୍ଯକ୍ତ ପରମେଶ୍ବରଙ୍କ ବ୍ଯକ୍ତରୂପକୁ ଜାଣିନପାରି ତାଙ୍କୁ ଅବଜ୍ଞା ପ୍ରଦର୍ଶନ କରନ୍ତି । ସେମାନେ ଆସୁରୀ ପ୍ରକୃତିର ହୋଇଥିବାରୁ ସେମାନଙ୍କର ଆଶା,କର୍ମ ଓ ଜ୍ଞାନ ଆଦି ସବୁ ନିଷ୍ଫଳ ହୁଏ । କିନ୍ତୁ ସାତ୍ତ୍ବିକ ପ୍ରକୃତିର ବ୍ଯକ୍ତିମାନେ ଭଗବାନ ଶ୍ରୀକୃଷ୍ଣ ଜଗତର ମୂଳକାରଣ ଓ ଅବ୍ଯୟ ଅକ୍ଷର ତତ୍ତ୍ବ ବୋଲି ବୁଝି ତାଙ୍କର ଉପାସନା କରନ୍ତି । ସେମାନେ ନାନାଭାବରେ ଭଗବାନଙ୍କର ଆରାଧନା କରନ୍ତି । ଭଗବାନ ଶ୍ରୀକୃଷ୍ଣ ଏହି ଜଗତର ପିତା,ମାତା,ଧାତା,ପିତାମହ ଓ ଏକମାତ୍ର ଜ୍ଞେୟ ତତ୍ତ୍ବ । ସେ ଓଁକାର,ସମସ୍ତ ବେଦ,ଯଜ୍ଞ,ମନ୍ତ୍ର ଓ ହୋମ ଇତ୍ଯାଦି । ସେ ସମସ୍ତଙ୍କୁ ଉତ୍ତାପ ଓ ଆଲୋକ ଦିଅନ୍ତି । ଜଳକୁ ଆକର୍ଷଣ କରି ବୃଷ୍ଟି କରାନ୍ତି । ଫଳରେ ଶସ୍ଯ ଉତ୍ପାଦନ ହୁଏ ଓ ଜୀବଜଗତ ବଞ୍ଚିରହେ ।
ବେଦର କର୍ମକାଣ୍ଡୀମାନେ ଭୋଗବିଳାସ କାମନା କରି ନାନାପ୍ରକାର ଯଜ୍ଞରେ ଭଗବାନଙ୍କୁ ପୂଜାକରି ସ୍ବର୍ଗଲୋକ ପ୍ରାପ୍ତ ହୁଅନ୍ତି । ତାଙ୍କର ପୁଣ୍ଯ ସରିଗଲେ ପୁଣି ମର୍ତ୍ତ୍ଯଲୋକରେ ଜନ୍ମଗ୍ରହଣ କରନ୍ତି । ମାତ୍ର ଯେଉଁମାନେ ଅନନ୍ଯ ଚିତ୍ତରେ ନିଷ୍କାମ ଭାବରେ ଭଗବାନଙ୍କର ଉପାସନା କରନ୍ତି ଭଗବାନ ସେମାନଙ୍କର ଯୋଗକ୍ଷେମ ବହନ କରନ୍ତି । ସେମାନେ ଶରଣାଗତ ଭକ୍ତ ହୋଇଥିବାରୁ ସେମାନଙ୍କର ସାଂସାରିକ ଅଭାବ ଅସୁବିଧା କିଛି ରହେନା । ଦେବତାମାନଙ୍କୁ ପୂଜାକରୁଥିବା ବ୍ଯକ୍ତିମାନେ ପିତୃଲୋକ ପ୍ରାପ୍ତ ହୁଅନ୍ତି, ଭଗବାନଙ୍କୁ ଉପାସନା କରୁଥିବା ବ୍ଯକ୍ତିମାନେ ଭଗବାନଙ୍କୁ ହିଁ ପ୍ରାପ୍ତ ହୁଅନ୍ତି । ଭଗବାନଙ୍କ ପୂଜାପାଇଁ ବିଶେଷ କିଛି ଆବଶ୍ୟକ ନାହିଁ । ଗୋଟିଏ ପତ୍ର,ଗୋଟିଏ ଫୁଲ, ଗୋଟିଏ ଫଳ କିମ୍ବା ଟିକିଏ ଜଳ ଭକ୍ତିର ସହିତ ସମର୍ପଣ କଲେ ସେ ସନ୍ତୁଷ୍ଟ ହୁଅନ୍ତି । ଏଣୁ ଯାହା କରୁଛ,ଯାହା ଖାଉଛ, ଯାହା ହୋମ କରୁଛ,ଯାହା ଦାନ କରୁଛ ଇତ୍ଯାଦି ସମସ୍ତ କର୍ମ ପରମେଶ୍ବର ଶ୍ରୀକୃଷ୍ଣଙ୍କୁ ସମର୍ପଣ କରିବାକୁ ସେ ଅର୍ଜୁନଙ୍କୁ ପରାମର୍ଶ ଦେଇଛନ୍ତି ।
ଭଗବାନଙ୍କର କେହି ପ୍ରିୟ ନୁହେଁ କି କେହି ଅପ୍ରିୟ ନୁହେଁ । ଭକ୍ତିରେ ଯେ ତାଙ୍କୁ ଭଜେ ସେ ତାଙ୍କର ଅତ୍ଯନ୍ତ ପ୍ରିୟ । ଅତ୍ଯନ୍ତ ପାପୀ ମଧ୍ଯ ତାଙ୍କୁ ଭକ୍ତିରେ ଭଜି ମୋକ୍ଷପ୍ରାପ୍ତ ହୋଇଛନ୍ତି । ଭକ୍ତି କରିବାରେ ସ୍ତ୍ରୀ,ଶୂଦ୍ର,ପାପ ଯୋନିସଂଭୂତଙ୍କ ପାଇଁ ମଧ୍ଯ ବାଧା ନାହିଁ । ଏଣୁ ସେମାନେ ଭଗବାନଙ୍କୁ ଭକ୍ତିକରି ମୁକ୍ତଲାଭ କରିପାରିବେ । ଅର୍ଜୁନ କ୍ଷତ୍ରିୟ ହୋଇଥିବାରୁ ତାଙ୍କର ଉପାସନା କରିବାର ଶାସ୍ତ୍ରାଧିକାର ଅଛି । ସୁତରାଂ ମନପ୍ରାଣ ଶ୍ରୀକୃଷ୍ଣ (ସାକାର ବ୍ରହ୍ମ)ଙ୍କଠାରେ ସମର୍ପଣ କରି ତାଙ୍କର ଭକ୍ତ ଓ ଶରଣାଗତ ହେବାକୁ ଭଗବାନ ଅର୍ଜୁନଙ୍କୁ କହିଛନ୍ତି । ସେହିପରି କରିପାରିଲେ ସେ ନିଶ୍ଚୟ ମୋକ୍ଷ ଲାଭ କରିବେ ।
ସଂଗ୍ରାହକ– କବିକମଳ ନରେନ୍ଦ୍ର ପ୍ରସାଦ ବେହେରା,
ସମ୍ପାଦକ – ମୋ ଅନୁଷ୍ଠାନ, ଆଳଦା, ଖଇରା, ବାଲେଶ୍ବର,
