ପେଣ୍ଟା ଶିବ ମନ୍ଦିର ଚୋରି ଘଟଣାର ପର୍ଦ୍ଦାଫାସ, ୩ ଗିରଫ
ରାୟଗଡ଼ା, ୨୭ ଅଗଷ୍ଟ: ପେଣ୍ଟା ଶିବ ମନ୍ଦିରରେ ଘଟିଥିବା ଚୋରି ଘଟଣାର ପର୍ଦ୍ଦାଫାସ କରିଛି ଚାନ୍ଦିଲି ପୁଲିସ। ଏହି ଘଟଣାରେ ୩ ଜଣ ଅଭିଯୁକ୍ତଙ୍କୁ ଗିରଫ କରାଯିବା ସହ ଚୋରି ହୋଇଥିବା ଶିବ ଓ ପାର୍ବତୀଙ୍କ ଧାତୁ ମୂର୍ତ୍ତି, ପଞ୍ଚମୁଖୀ ନାଗଙ୍କ ପିତ୍ତଳ ମୂର୍ତ୍ତି, ନଗଦ ଟଙ୍କା ଓ ଅନ୍ୟାନ୍ୟ ସାମଗ୍ରୀ ଉଦ୍ଧାର କରାଯାଇଛି।
ପୁଲିସ ସୂଚନା ଅନୁଯାୟୀ, ଅଗଷ୍ଟ ୨୫ ତାରିଖ ରାତିରୁ ୨୬ ତାରିଖ ସକାଳ ମଧ୍ୟରେ ପେଣ୍ଟା ଶିବ ମନ୍ଦିରରେ ଏହି ଚୋରି ଘଟିଥିଲା। ମନ୍ଦିରର ପୂଜକ ସି.ଏଚ୍. ନାଗରାଜୁ (୫୫), ବି.ସି. ରୋଡ୍, ଜେ.କେ. ପୁର, ବିଶିରାଦ ନିବାସୀ, ଅଗଷ୍ଟ ୨୫ ତାରିଖ ସକାଳ ପ୍ରାୟ ୧୦ଟା ସମୟରେ ପୂଜା ସମାପ୍ତ କରି ମନ୍ଦିରରେ ତାଲା ପକାଇ ଘରକୁ ଯାଇଥିଲେ।
ପରଦିନ, ଅଗଷ୍ଟ ୨୬ ତାରିଖ ସକାଳେ ମନ୍ଦିରକୁ ଆସି ସେ ମୁଖ୍ୟ ଦ୍ୱାରର ତାଲା ଭଙ୍ଗା ଥିବା ଦେଖିଥିଲେ। ମନ୍ଦିର ଭିତରକୁ ପ୍ରବେଶ କରିବା ପରେ ଭଗବାନ ଶିବଙ୍କ ଧାତୁ ମୂର୍ତ୍ତି, ମା’ ପାର୍ବତୀଙ୍କ ଧାତୁ ମୂର୍ତ୍ତି ସମେତ ଦୁଇଟି ଘଣ୍ଟି, ଦୁଇଟି ବାଲ୍ଟି, ଦୁଇଟି ହାତ ଘଣ୍ଟି ଓ ଅନ୍ୟାନ୍ୟ ପୂଜା ସାମଗ୍ରୀ ଚୋରି ହୋଇଥିବା ଜାଣିବାକୁ ପାଇଥିଲେ। ଏନେଇ ସେ ଚାନ୍ଦିଲି ଥାନାରେ ଅଭିଯୋଗ କରିଥିଲେ।
ଅଭିଯୋଗ ଆଧାରରେ ଚାନ୍ଦିଲି ଥାନା ପୁଲିସ କେସ୍ ନମ୍ବର ୨୬୧/୨୦୨୬, ତାରିଖ ୨୬.୦୮.୨୦୨୬, ଭାରତୀୟ ନ୍ୟାୟ ସଂହିତା (BNS)ର ଧାରା ୩୦୫(ଏ)/୩୩୧(୪)/୩(୫) ଅନୁଯାୟୀ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା।
ତଦନ୍ତ ସମୟରେ ପୁଲିସ ୩ ଜଣ ଅଭିଯୁକ୍ତଙ୍କୁ ଗିରଫ କରିଥିଲା। ସେମାନେ ହେଲେ ନୂଆପଡ଼ାର ସାଗର ଦୁର୍ଗାଙ୍କ ପୁଅ ମନୋଜ ଦୁର୍ଗା (୩୩), ନୂଆପଡ଼ାର ସ୍ୱର୍ଗତ ସନ୍ତୋଷ ଗଣ୍ଟାଙ୍କ ପୁଅ ପବନ ଗଣ୍ଟା (୧୯) ଏବଂ ଅମ୍ଳାଭଟାର ଆଲ୍ଲୁ ରାମା ରାଓଙ୍କ ପୁଅ ଆଲ୍ଲୁ ହରେକୃଷ୍ଣ (୩୫)। ତିନିଜଣଙ୍କ ଘର ଚାନ୍ଦିଲି ଥାନା ଅଧୀନ ରାୟଗଡ଼ା ଜିଲ୍ଲାରେ।
ପୁଲିସ ସୂଚନା ଅନୁଯାୟୀ, ଗିରଫ ଅଭିଯୁକ୍ତମାନେ ପେଣ୍ଟା ଶିବ ମନ୍ଦିରରେ ଚୋରି କରିଥିବା ସ୍ୱୀକାର କରିଥିଲେ। ସେମାନଙ୍କ ଠାରୁ ୧୩.୯୬ କିଲୋଗ୍ରାମ ଓଜନର ଭଗବାନ ଶିବଙ୍କ ଧାତୁ ମୂର୍ତ୍ତି, ୭.୨୬ କିଲୋଗ୍ରାମ ଓଜନର ମା’ ପାର୍ବତୀଙ୍କ ଧାତୁ ମୂର୍ତ୍ତି, ୫.୬୨ କିଲୋଗ୍ରାମ ଓଜନର ପଞ୍ଚମୁଖୀ ନାଗଙ୍କ ପିତ୍ତଳ ମୂର୍ତ୍ତି, ନଗଦ ୧,୨୫୦ ଟଙ୍କା ଏବଂ ଗୋଟିଏ ଧଳା ଜେରି ବ୍ୟାଗ୍ ଜବତ କରାଯାଇଛି।
ଅଭିଯୁକ୍ତ ମନୋଜ ଦୁର୍ଗାଙ୍କ ସୂଚନା ଆଧାରରେ ଚୋରି ହୋଇଥିବା ଭଙ୍ଗା ପିତ୍ତଳ ଓ ତମ୍ବା ସାମଗ୍ରୀ ମଧ୍ୟ ପୁଲିସ ଉଦ୍ଧାର କରିଛି।ଏହାଛଡ଼ା ଚୋରି ଘଟଣାରେ ବ୍ୟବହୃତ ହଳଦିଆ ରଙ୍ଗର Piaggio ଅଟୋ (ନମ୍ବର OD 18 C 3139) ଏବଂ Bajaj Pulsar ମୋଟରସାଇକେଲ (ନମ୍ବର AP 40 CK 3976)କୁ ମଧ୍ୟ ପୁଲିସ ଜବତ କରିଛି।
ତିନିଜଣ ଅଭିଯୁକ୍ତଙ୍କୁ ୨୬ ଅଗଷ୍ଟ ୨୦୨୬ରେ ଗିରଫ କରାଯାଇଥିଲା। ପରେ ସେମାନଙ୍କୁ ମାନ୍ୟବର ଅଦାଲତରେ ହାଜର କରାଯାଇ ନ୍ୟାୟିକ ହେପାଜତ (Judicial Remand) କୁ ପଠାଯାଇଛି। ଚୋରି ହୋଇଥିବା ମନ୍ଦିରର ମୂଲ୍ୟବାନ ମୂର୍ତ୍ତି ଓ ଅନ୍ୟାନ୍ୟ ସାମଗ୍ରୀ ଉଦ୍ଧାର ସହ ୨୪ ଘଣ୍ଟା ମଧ୍ୟରେ ଘଟଣାରେ ସଫଳତା ହାସଲ କରିବା ପୁଲିସର ତଦନ୍ତରେ ଏକ ବଡ଼ ସଫଳତା ବୋଲି କୁହାଯାଇଛି।
ଗୌରୀ ପଟ୍ଟନାୟକ ଙ୍କ ରିପୋର୍ଟ୍
