ଜୟପାଟଣା: ସଭ୍ୟତା ଯେତେ ଆଧୁନିକୀକରଣ ହେଉ କିନ୍ତୁ ଗ୍ରାମ୍ୟ ସଭ୍ୟତାରେ ଅଦ୍ୟାବଧି ପୁରାତନ ଚଳଣି ଚଳିଆସୁଛି । ଗ୍ରାମାଞ୍ଚଳ ଜୀବନ ଜୀବିକାରେ ଗାଁ ପୋଖରୀର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ପ୍ରାତଃର ଶୌଚ ହେବାଠାରୁ ସ୍ନାନକାର୍ଯ୍ୟ,ଲୁଗାପଟା ସଫାସୁତୁରା, ଗୋରୁଗାଈଙ୍କୁ ସ୍ନାନ କରାଇବା,ଜଳ ପିଆଇବା ତଥା କୃଷିକ୍ଷେତ୍ରରେ ଆବଶ୍ୟକ ସ୍ଥଳେ ଜଳସେଚନର ବ୍ୟବସ୍ଥା ଏବଂ ମଲା କାର୍ଯ୍ୟରେ ଶୁଦ୍ଧିକ୍ରିୟା ପର୍ଯ୍ୟନ୍ତ ଅତ୍ୟାବଶ୍ୟକ ହୋଇଥାଏ । ଏପରି ସ୍ଥଳେ ଏହାର ଦୁରୂପଯୋଗ କରିବା ଅକ୍ଷମନୀୟ । 
ଏପରି ଏକ ଅଭାବନୀୟ ଘଟଣା ଘଟିଛି କଳାହାଣ୍ଡି ଜିଲ୍ଲା ଜୟପାଟଣା ବ୍ଲକ ଅନ୍ତର୍ଗତ କୁଚାଗାଁ ଠାରେ । ଜନବହୁଳ ତିନୋଟି ୱାର୍ଡ ବିଶିଷ୍ଟ ଏହି ଗ୍ରାମର ଜନସାଧାରଣ ମାଝୀବନ୍ଧ ଉପରେ ସମ୍ପୂର୍ଣ୍ଣ ନିର୍ଭରଶୀଳ । ଏହି ପୋଖରୀରେ ଘଟିଯାଇଛି ବଡ ଧରଣର ଅଘଟଣ । ଗ୍ରାମବାସୀଙ୍କର ଅଭିଯୋଗ ଅନୁଯାୟି ଚଳିତ ବର୍ଷ ଗ୍ରାମ ପଞ୍ଚାୟତ କୁଚାଗାଁରେ ଏହି ପୋଖରୀର ନିଲାମ ହୋଇଥିଲା । ନିଲାମରେ ଗତଥରର ନିଲାମଧାରୀମାନେ ଏଇଥର ପାଇଲେ ନାହିଁ ।
ଗ୍ରାମ ପଞ୍ଚାୟତ ଦ୍ୱାରା ସେମାନଙ୍କୁ ବଳକା ପୁରୁଣା ମାଛକୁ ଧରିବା ପାଇଁ ୧୫ଦିନ ମହୁଲତ ଦିଆଯାଇଥିଲା । ସେ ମୁତାବକ ସଂପୃକ୍ତ ଗ୍ରୁପ ମାଛ ଧରିଥିଲା ଏବଂ ଗ୍ରୁପର କୌଣସି ଦୁର୍ବୁର୍ତ୍ତ ପୋଖରୀରେ କୀଟନାଶକ ବିଷ ପକାଇ ଦେଲେ । ଯାହା ଫଳରେ ସମ୍ପୁର୍ଣ୍ଣ ପୋଖରୀର ମାଛ,କଙ୍କଡା,ବେଙ୍ଗ ଇତ୍ୟାଦି ଜୀବ ସମ୍ପୁର୍ଣ୍ଣ ମରି ଭାସିଲେ ଏବଂ ପାଚିଯାଇ ପୋଖରୀର ଜଳରୁ ଦୁର୍ଗନ୍ଧ ବାହାରୁଥିବା ଦେଖିବାକୁ ମିଳିଛି । ଏହା ଜନସାଧାରଣଙ୍କ ପାଇଁ ବିପଦ ସୃଷ୍ଟି କରିଛି । ସ୍ଥାନୀୟ ସରପଞ୍ଚଙ୍କୁ ଏ ବିଷୟରେ ପଚାରିବାରୁ ସେ ସନ୍ତୁଷ୍ଟିଜନକ ଉତ୍ତର ଦେଇ ପାରିନଥିଲେ । ସେ ଏହି ଘଟଣାକୁ ପୋଲିସ ପ୍ରଶାସନକୁ ମଧ୍ୟ ଜଣାଇ ନଥିବା ସୂଚନା ମିଳିଛି ।
ଗ୍ରାମବାସୀଙ୍କର ଅଭିଯୋଗ ଅନୁଯାଇ ସ୍ଥାନୀୟ ସରପଞ୍ଚଙ୍କର ଏହି ଘଟଣାରେ ସମର୍ଥନ ଥିବା ଜଣାପଡିଛି । ବାଡ ଯଦି ଫସଲ ଖାଏ ଦୋଷ ଦେବା କାହାକୁ । ସ୍ଥାନୀୟ ଜିଲ୍ଲା ପରିଷଦ ସଦସ୍ୟ ଅଙ୍ଗଦ ମାଝୀ ମଧ୍ୟ ଏହି ଗ୍ରାମର । ସେ ଏହି ଘଟଣାର ନିନ୍ଦାକରି ଖୋଦ ନିଜେ ପୋଲିସ ପ୍ରଶାସନର ଦ୍ୱାରସ୍ଥ ହୋଇଛନ୍ତି । ଜୟପାଟଣା ପୋଲିସ ଉକ୍ତ ପୋଖରୀରେ ଲାଲ ଝଣ୍ଡା ଗାଡି ନିସିଦ୍ଧାଞ୍ଚଳ ଘୋଷଣା କରିଛି । ଆଗକୁ ପ୍ରଶାସନ ଏହି ଘଟଣାର ଆଉ କିଛି ଦୃଢ଼ ପଦକ୍ଷେପ ନେଉଛି କି ଦୁର୍ବୁର୍ତ୍ତଙ୍କର ପାଲରେ ଛନ୍ଦି ହେଉଛି ଗ୍ରାମବାସୀ ନ୍ୟାୟକୁ ଅଶାବାନ୍ଧି ବସିଥିବା ଜଣାପଡିଛି ।
ଜୟପାଟଣା ରୁ ହୃଷିକେଶ ମୁଣ୍ଡ ଙ୍କ ରିପୋର୍ଟ
