ଲାଞ୍ଜିଗଡ଼,୨୮/୦୮(ମନିସ)-ଓଡ଼ିଶାର ଅଗ୍ରଣୀ ସାମ୍ବାଦିକ ସଂଗଠନ ଲାଞ୍ଜିଗଡ ପ୍ରେସ୍ କ୍ଲବର ଏକ ଗୁରୁତ୍ୱପୂର୍ଣ୍ଣ ବୈଠକ ଆଜି ଲାଞ୍ଜିଗଡଠାରେ ଅନୁଷ୍ଠିତ ହୋଇଯାଇଛି । ଲାଞ୍ଜିଗଡ଼ ପ୍ରେସ୍ କ୍ଲବର ସଭାପତି କୈଳାସ ସାହୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ବ୍ଲକ ଅଞ୍ଚଳର ବିଭିନ୍ନ ସମସ୍ୟା ଓ ଏହାର ନିରାକରଣ ତଥା ଶାସନ ପ୍ରଶାସନ ମଧ୍ୟରେ ଯୋଗସୂତ୍ର ପାଲଟି ଅଞ୍ଚଳର ବିକାଶ ଦିଗରେ ପ୍ରେସ୍ କ୍ଲବର ଭାଗିଦାରିତା ସଂପର୍କରେ ଆଲୋଚନା କରାଯାଇଥିଲା । ସାମ୍ବାଦିକତା ଜରିଆରେ ଅଞ୍ଚଳର ସାମଗ୍ରିକ ବିକାଶ କ୍ଷେତ୍ରରେ କ୍ଲବର ସମସ୍ତ ସଦସ୍ୟଙ୍କ କଲମ ଚାଳନା ସହିତ ଅଗ୍ରଣୀ ଭୂମିକାକୁ ଆଗାମୀ ଦିନରେ ବଜାୟ ରଖିବା ଉପରେ ଗୁରୁତ୍ୱାରୋପ କରାଯାଇଥିଲା । ବ୍ଲକର ଦୁର୍ଗମ ତଥା ମାଓପ୍ରବଣ ଅଞ୍ଚଳରେ ବିଭିନ୍ନ ପ୍ରତିକୂଳ ପରିସ୍ଥିତିରେ କ୍ଲବର ସାଥୀ ସଦସ୍ୟମାନେ ସାମ୍ବାଦିକତା କରିବା ଦ୍ୱାରା ସେସବୁ ଅଞ୍ଚଳ ଶାସନ ପ୍ରଶାସନର ନଜରରେ ରହିବା ଓ ସରକାରୀ ସୁବିଧା ସୁଯୋଗ ପହଞ୍ଚିପାରୁଥିବା ବିଷୟରେ ସଦସ୍ୟମାନେ ଆଲୋଚନା କରିଥିଲେ । ରାଜ୍ୟର ଅଗ୍ରଣୀ ସାମ୍ବାଦିକ ସଂଗଠନ ଭାବେ ଲାଞ୍ଜିଗଡ଼ ପ୍ରେସ୍ କ୍ଲବର ନାଁ ଥିବାବେଳେ କ୍ଲବର ଦଶମ ପ୍ରତିଷ୍ଠା ଦିବସ ଅବସରରେ ଏକ ରାଜ୍ୟସ୍ତରୀୟ କାର୍ଯ୍ୟକ୍ରମ କରାଯିବାକୁ ସର୍ବସମ୍ମତି କ୍ରମେ ନିଷ୍ପତ୍ତି ନିଆଯାଇଥିଲା । ଏହି ଅବସରରେ କ୍ଲବର ବିଭିନ୍ନ ବୈଠକ ଓ କାର୍ଯ୍ୟକ୍ରମରେ ଦୀର୍ଘ ଦିନ ଧରି ସକ୍ରିୟ ଭାବେ ଯୋଗ ଦେଉନଥିବା ବି. ତ୍ରିପତି ପାତ୍ରଙ୍କ ସଦସ୍ୟତା ରଦ୍ଦ ପ୍ରସ୍ତାବ ଆଗତ କରାଯାଇ ସର୍ବସମ୍ମତି କ୍ରମେ ପାରିତ କରାଯାଇଥିଲା । ସେହିପରି କ୍ଲବର ନୂତନ ଉପସଭାପତି ଭାବେ ସାମ୍ବାଦିକ କ୍ଷମାନିଧି ମହାକୁଡଙ୍କୁ ମନୋନୀତ କରାଯାଇଥିଲା । ପ୍ରେସ୍ କ୍ଲବର ସମସ୍ତ ସଦସ୍ୟ ତାଙ୍କୁ ଉପଢୌକନ ଦେଇ ସ୍ୱାଗତ ସମ୍ବର୍ଦ୍ଧନା ଜଣାଇଥିଲେ । ଏଥିରେ ପ୍ରେସ୍ କ୍ଲବର ସାଧାରଣ ସଂପାଦକ ସୁଶୀଲ କୁମାର ବାଗ, କୋଷାଧ୍ୟକ୍ଷ ପରେଶ କୁମାର ନାୟକ, ସକ୍ରିୟ ସଦସ୍ୟ ଏମ୍. ଚନ୍ଦ୍ରଶେଖର, ରମେଶ କୁମାର ନାୟକ, କୋଦଣ୍ଡଧର ପ୍ରଧାନ, ଧର୍ମେନ୍ଦ୍ର ପଣ୍ଡା ପ୍ରମୁଖ ଯୋଗଦେଇ ଆଲୋଚନାରେ ସକ୍ରିୟ ଅଂଶଗ୍ରହଣ କରିଥିଲେ । ଏମ୍. ଚନ୍ଦ୍ରଶେଖର କାର୍ଯ୍ୟକ୍ରମ ପରିଚାଳନା ସହିତ ଧନ୍ୟବାଦ ଅର୍ପଣ କରିଥିଲେ ।
ଲାଞ୍ଜିଗଡ଼ ରୁ ସୁଶୀଲ କୁମାର ବାଗ ଙ୍କ ରିପୋର୍ଟ
