ଗୁରୁ

ଗୁରୁ ଆମ ଶ୍ରେଷ୍ଠ ଗୁରୁ ଆମ ଜ୍ୟେଷ୍ଠ 

ଗୁରୁ ହିଁ ମାର୍ଗଦର୍ଶକ, 

ଜ୍ଞାନ ଦକ୍ଷତାର ଔଜ୍ୱଲ୍ୟ ଭଣ୍ଡାର 

ଗୁରୁ ପଥ ପଦର୍ଶକ l

ଜ୍ଞାନର ବାରିଧି ଆଦର୍ଶର ନିଧି 

ସଂସ୍କାର ସଂସ୍କୃତି ଦେଇ, 

ନୀତିଶିକ୍ଷା ଦାନେ ପ୍ରୀତ ହୋଇ ମନେ 

ଗୁରୁ ନାମ ସଦା ପାଇ l

ବତୀ ପରି ନିଜେ ଚିରନ୍ତନ ଜଳି

ଜ୍ଞାନର ଆଲୋକ ଢାଳି, 

ଚେତନାର ଶକ୍ତି ମନେ ଭରିଦେଇ 

ଅଜ୍ଞାନ ଦିଅନ୍ତି ଟାଳି l

ଉତ୍ତମ ଚରିତ୍ର ଶୃଙ୍ଖଳିତ ଜ୍ଞାନ 

ସ୍ନେହ ଶ୍ରଦ୍ଧା ବିତରଣ,  

ପ୍ରେରଣା ଉତ୍ସାହ ଭବିଷ୍ୟତ ଦାନ 

ଶୁଝିକି ପାରିବା ଋଣ l

ଗୁରୁ ମନ୍ଦାକିନୀ ପୂଣ୍ୟ ବୀଜ ବୁଣି 

ପାପ ରାଶି ସବୁ ଧୋଇ, 

ମନ ହୃଦୟକୁ ପବିତ୍ର କରନ୍ତି 

ମଳୟ ପବନ ହୋଇ l

ଗୁରୁ ମାତା ପିତା ଗୁରୁ ଶିକ୍ଷା ଦାତା 

ଗୁରୁ ଆମ ଦୀକ୍ଷା ଦାତା, 

ଜଗତର ଗୁରୁ ପ୍ରଭୁ ଭଗବାନ 

ସଂସାରର ମୁକ୍ତିଦାତା l

ହେ ମହାମହିମ ରଖିଗଲ ନାମ 

ଶ୍ରେଷ୍ଠ ଗୁରୁ ତୁମେ ହୋଇ, 

ହେ ପ୍ରଜ୍ଞା ପୁରୁଷ ରହିଗଲା ଯଶ 

ବହୁ ସମ୍ମାନକୁ ପାଇ l

ଡ.ପ୍ରଶାନ୍ତ କୁମାର ଶତପଥୀ 

ଛତ୍ରପୁର, ଗଞ୍ଜାମ