ମାତୃ ଦିବସ
ଆଖି ଯେବେ ଖୋଲି ଦୁନିଆ ଦେଖିଲି
ତୋ ମୁହଁ ଦିଶିଲା ମତେ
ମୋର କୁଆଁ କୁଆଁ ତୋ ମନରେ ଖୁସି
ଆଣି ଦେଇଥିଲା କେତେ….||
ମୋ କୁନି ଓଠରେ ମାଆ ମାଆ ଡାକ
ତୋ କାନରେ ଯେବେ ପଡେ
ଆସୁ ତୁ ଦଉଡି ସବୁ କାମ ଛାଡ଼ି
ମମତାର ବାନା ଉଡେ…..||
ମୋ ଓଳି ଅଝଟ ଲାଗେ ନାହିଁ କଷ୍ଟ
ପଥର ପାଲଟି ଯାଉ
ବୁଝିମୁଁ ପାରୁନି ସବୁତକ ଖୁସି
ମତେ କାହିଁ ଦେଇ ଦେଉ….||
ମୋର ସ୍ୱପ୍ନ ପାଇଁ ତୋର ନିଦ ନାହିଁ
ଦୁଃଖ କ’ଣ ଜାଣି ନାହିଁ
ଭାରି କଷ୍ଟ ପାଏ ଯେବେ କିଏ କହେ
ମାଆ ଋଣ ସୁଝେ ନାହିଁ….||
ନ ସୁଝୁ ସେ ଋଣ ଗାଉଥିବି ଗୁଣ
ମାଆର ମମତା ବଡ଼
ଓଦା ହେବ ନାହିଁ ତା ପଣତ କାନି
ଆସିଲେ ବି ଯେତେ ଝଡ଼….||
ବିଶ୍ୱଜିତ୍ ନାୟକ
ରାଜଘର ପୋଖରୀ, ବାସୁଦେବ ପୁର, ଭଦ୍ରକ
