ଏସ୍ ଏସ୍ ଆର୍ ଭି ଏମ୍ ଇସ୍ପାତ ବିଦ୍ୟାଳୟ ରେ କୃତ୍ରିମ ବୁଦ୍ଧିମତ୍ତାର ପ୍ରଭାବ ସମ୍ପର୍କୀୟ ସମ୍ପାନ ଅନୁଷ୍ଠିତ
ରାଉରକେଲା: ସ୍ଥାନୀୟ ଏସ୍ ଏସ୍ ଆର୍ ଭି ଏମ୍ ଇସ୍ପାତ ଇଂରାଜୀ ମାଧ୍ୟମ ବିଦ୍ୟାଳୟ ସଭାଗୃହରେ ବିଦ୍ୟାଳୟ ର ଛାତ୍ରଛାତ୍ରୀ ଓ ଶିକ୍ଷକଶିକ୍ଷୟିତ୍ରୀ ଙ୍କ ପାଇଁ ‘ କୃତ୍ରିମ ବୁଦ୍ଧିମତ୍ତା:ପେଶା ଏବଂ ଶିକ୍ଷା ର ଭବିଷ୍ୟତ’ ଶୀର୍ଷକ ଏକ ସେମିନାର ଆୟୋଜିତ ହୋଇଯାଇଛି। ଶ୍ରୀ ଶ୍ରୀ ରବିଶଙ୍କର ଇସ୍ପାତ ବିଦ୍ୟାଳୟ ସମୁହ ର ନିର୍ଦ୍ଦେଶକ ଡ ଗିରିଜା ଶଙ୍କର ଦାସ ଓ ସେକ୍ଟର ୨୦ ସ୍ଥିତ ଇସ୍ପାତ ଇଂରାଜୀ ମାଧ୍ୟମ ବିଦ୍ୟାଳୟ ର ଅଧ୍ୟକ୍ଷା ଖୁସୁବୁ ଜ୍ୟୋତି ଙ୍କ ଉପସ୍ଥିତିରେ ସେମିନାର ରେ ଆନ୍ତର୍ଜାତୀୟ ଖ୍ୟାତି ସମ୍ପନ୍ନ କୃତ୍ରିମ ବୁଦ୍ଧିମତ୍ତା ବିଶେଷଜ୍ଞ, ଭାରତ ସରକାରଙ୍କ ନବ ଉଦ୍ଭାବନ ପରିଷଦ ର ପ୍ରାକ୍ତନ ସଦସ୍ୟ,ଦିଲ୍ଲୀ ଆଇ ଆଇ ଟି ର ବୈଜ୍ଞାନିକ ଡ ସୁବ୍ରତ କୁଣ୍ଡୁ ମାର୍ଗ ଦର୍ଶନ କରିଥିଲେ। ସେ ତାଙ୍କ ବକ୍ତବ୍ୟରେ କହିଥିଲେ ଯେ କୃତ୍ରିମ ବୁଦ୍ଧିମତ୍ତା ର ପ୍ରବେଶ ଯୋଗୁଁ ଅଧିକାଂଶ ପାରମ୍ପରିକ ଶିକ୍ଷା ଓ ପେଶା କ୍ଷେତ୍ରରେ ବିପୁଳ ପରିବର୍ତ୍ତନ ଏବଂ ସଙ୍କଟ ଆସିବ। ସେଥିପାଇଁ ପ୍ରତ୍ୟେକ ଟି ଦେଶର ଛାତ୍ରଛାତ୍ରୀ ତଥା ଶିକ୍ଷା ବ୍ୟବସ୍ଥା ଏହି ସଙ୍କଟ ସମୂହ କୁ ସାମ୍ନା କରିବା ପାଇଁ ନିଜକୁ ପ୍ରସ୍ତୁତ କରିବା ଆବଶ୍ୟକ। କୃତ୍ରିମ ବୁଦ୍ଧିମତ୍ତା ର ପ୍ରଚଳନ ପରବର୍ତ୍ତୀ ଯୁଗରେ ପିଲାମାନେ ପାରମ୍ପରିକ ଶିକ୍ଷା ସହିତ ନିଜ ମଧ୍ୟରେ ସୃଜନଶୀଳ ପ୍ରଜ୍ଞା ର ବିକାଶ ଘଟାଇବା ନିହାତି ଆବଶ୍ୟକ ବୋଲି ଡ କୁଣ୍ଡୁ ତାଙ୍କ ବକ୍ତବ୍ୟରେ ପ୍ରକାଶ କରିଥିଲେ। ସମ୍ପାନ ରେ ଡ କୁଣ୍ଡୁ ପିଲାମାନଙ୍କ ବିଭିନ୍ନ ପ୍ରଶ୍ନର ଉତ୍ତର ଦେଇଥିଲେ ଏବଂ ଦୀର୍ଘ ସମୟଧରି ଏହି ପ୍ରଶ୍ନୋତ୍ତର କାର୍ଯ୍ୟକ୍ରମ ପିଲାମାନଙ୍କ ପାଇଁ ଖୁବ୍ ମନଛୁଆଁ ହୋଇଥିଲା। କାର୍ଯ୍ୟକ୍ରମ ର ସଫଳତା ପାଇଁ ଶେଷରେ ବିଦ୍ୟାଳୟ ସମୁହ ର ନିର୍ଦ୍ଦେଶକ ଡକ୍ଟର ଗିରିଜା ଶଙ୍କର ଦାସ ଧନ୍ୟବାଦ ଅର୍ପଣ କରିଥିଲେ ।
କୁଞ୍ଜ ବିହାରି ରାଉତ ଙ୍କ ରିପୋର୍ଟ୍
