ନନ୍ଦିଘୋଷରେ ନନ୍ଦ ନନ୍ଦନ
ଶ୍ଯାମା ପ୍ରସାଦ୍ ବୋଷ୍
ନନ୍ଦ ପୁଅ ଆସେ ନନ୍ଦି ଘୋଷ ପରେ
ବଡଦାଣ୍ଡ ଦୁଲୁକାଇ
ଭକତ ମେଳ ରେ ଘୋଷଯାତ୍ରା କରେ
ପତିତ ଉଦ୍ଧାର ପାଇଁ ।
ରତ୍ନ ସିଂହାସନ କରି ଦେଇ ଶୂନ୍ୟ
ବଡଦାଣ୍ଡେ ଆସିଥାଇ
ନନ୍ଦିଘୋଷ ପରେ ବାମନ ରୂପରେ
ଭକତେ ଦର୍ଶନ ପାଇ ।
କରି ଲୀଳା ଖେଳା ପ୍ରଭୁ ଚକାଡୋଳା
ଭାଇ ଭଗ୍ନୀ ସାଥେ ନେଇ
ଗୁଣ୍ଡିଚା ମନ୍ଦିରେ ଜନମ ବେଦୀରେ
ଭକ୍ତ ମେଳେ ଆସେ ସେଇ ।
ନବ ଦିନ ବିତେ ମାଆ ପାଖେ ସତେ
ଆଡପ ଅଭଡା ଖାଇ
ବରଷକେ ଥରେ ରଥ ଯାତରାରେ
ଜନ୍ମସ୍ଥାନେ ଆସିଯାଇ ।
ଜାତି ଭେଦ ଭୁଲି ଆସିଥାଏ ଚାଲି
ଭକ୍ତ ଭାବେ ବାନ୍ଧି ହେଇ
ଭକତ ବାନ୍ଧବ ସେ କଳା ମାଧବ
ଏକାକାର କରି ଦେଇ ।
ନନ୍ଦ ପୁଅ ସେହି ନାଟ କରୁଥାଇ
ମାନବୀୟ ଲୀଳା ଏଇ
ନନ୍ଦିଘୋଷ ଚଢି ଆସୁଥାଏ ମାଡି
ଜଗନ୍ନାଥ ରୂପେ ସେଇ ।
ଦ୍ବାପର ଯୁଗରେ କୃଷ୍ଣ ଅବତାରେ
ନନ୍ଦ ପୁଅ ପରା ହେଇ
ଗୋପ ର ଦାଣ୍ଡରେ ମାନବ ଲୀଳାରେ
ନଟ ଖଟିଆ ଟି ସେଇ ।
ସର୍ବ ମନ ହରେ ସେ ବ୍ରଜ ଧାମରେ
ଗୋପ ଗୋପାଳୁଣୀ ନେଇ
ଆଜି ଶ୍ରୀକ୍ଷେତ୍ର ରେ ବଡଦାଣ୍ଡ ପରେ
ନନ୍ଦିଘୋଷେ ବିଜେ ହେଇ ।
ନନ୍ଦ ପୁଅ ଆସେ ବଡଦାଣ୍ଡ ହସେ
ନନ୍ଦିଘୋଷ ପରେ ଥାଇ
ବଡଦାଣ୍ଡ ଭରେ ଗୋପଦାଣ୍ଡ ସ୍ମରେ
ଭକ୍ତ ଭାବେ ହଜିଯାଇ ।
ଜୟ ଜଗନ୍ନାଥ ଜୟ ଜଗନ୍ନାଥ
ଭକତ ଉଠଇ ଗାଇ
ଭାବରେ ଭାବରେ ନନ୍ଦ ପୁଅ ଠାରେ
ଭକତେ ହୁଅନ୍ତି ବାଇ ।
ସେ କଳା ନାଗର ନନ୍ଦ ପୁଅ ଟିର
ଦ୍ବାପର ର ସ୍ମୃତି ନେଇ
ରଥ ଯାତରାରେ ଭାବ ବନ୍ଧନରେ
ଭକତ କୁ ବାନ୍ଧେ ସେଇ ।
ନନ୍ଦ ପୁଅ ଆସେ ନନ୍ଦି ଘୋଷ ହସେ
ତା ପ୍ରେମରେ ହଜିଯାଇ
ଆଜି ଶୀର୍ଷକ ରେ କବି କବିତା ରେ
ଶବଦ ପରଶ ପାଇ ।
ନନ୍ଦିଘୋଷ ପରେ ନନ୍ଦ ନନ୍ଦନରେ
ଜଗନ୍ନାଥ ରୂପେ ଥାଇ
ବଡ଼ଦାଣ୍ଡ ପରେ ଲୀଳା ଖେଳା କରେ
ଭକତ ହୁଅନ୍ତି ଵାଇ।
ଶ୍ଯାମା ପ୍ରସାଦ୍ ବୋଷ୍
ଗ୍ରାମ :- ବେଗୁନିଁଆ , ମଲ୍ଲୀକ୍ ସାହି
ପୋଷ୍ଟ :- ଗୋପ୍ , ଜିଲ୍ଲା :- ପୁରୀ
