ସନ୍ଧ୍ୟା
ଚନ୍ଦ୍ରକଳା, ବନ୍ଧୁଗାଁ, କୋରାପୁଟ
ଅସ୍ତହେଲେ ଦିନମଣୀ ଦିନ ହେଲା ଶେଷ
ସନ୍ଧ୍ୟାରାଣୀ ହସି ଆସେ ଧରି କଳାବେଶ |
ଦଳଦଳ ହୋଇ ପକ୍ଷୀ ନୀଡକୁ ଗମନ୍ତି
ଧୂଳି ଉଡାଇଣ ଗୋରୁପଲ ବାହୁଡନ୍ତି |
ଚାଷୀଭାଇ କାମଶେଷେ ମହାଆନନ୍ଦରେ
ନାନା ଗୀତ ଗାଇଗାଇ ବାହୁଡଇ ଘରେ |
ଚଉରା ମୂଳରେ ସଞ୍ଜବତୀ ଜଳିଉଠେ
ଖୋଳ, କରତାଳ ମନ୍ଦିରରେ ବାଜିଉଠେ |
ଚାହୁଁ ଚାହୁଁ ଅନ୍ଧକାର ମାଡିମାଡି ଆସେ
ଜଳ ସ୍ଥଳ ବନ ଗିରି ଅନ୍ଧକାର ଦିଶେ |
ମିଞ୍ଜିମିଞ୍ଜି ଆଲୋକରେ କୋଟିକୋଟିତାର|
ଧୀରେଧୀରେ ହସିହସି ଚାନ୍ଦ ଆସେ ଧରା |
ଖିଲିଖିଲି ଝୁଲିଝୁଲି ନାନା ଜାତି ଫୁଲ
ଭୂରୁଭୂରୁ ବାସନାର କିଏ ଦେବ ମୂଲ |
କମିକମି ଯାଇଥାଏ ଦିନର ଉତ୍ତାପ
ବଢ଼ିବଢ଼ି ଯାଏ ଥଣ୍ଡା ଆସଇ ସନ୍ତାପ |
ଦିନ ଶ୍ରମ ଅନ୍ତେ ବସି ସର୍ବ ଜନ ଘରେ
ବିଶ୍ରାମ ଲୋଡ଼ିଣ ଥାନ୍ତି ଆକୁଳ ଅନ୍ତରେ |
ମନ୍ଦମନ୍ଦ ସମୀର6ଣ ମୁଦ୍ରିତ ନୟନ
ଧୀରେଧୀରେ ଶୋଇଯାନ୍ତି ନରନାରୀଗଣ |
