ଜାଳିଛି ପ୍ରେମ‌ ଦୀପାଳି

   ତୃପ୍ତି ରାଣୀ ପାତ୍ର

ତୁମେ ଆଦିଅନ୍ତ ତୁମେ ଶକ୍ତିମନ୍ତ

ତୁମେ ମୋ ଜୀବନ ଦୀପ

ଦେହବନ୍ତ ହୋଇ ଦେଖାଅ ହେ ପଥ

ଧୋଇଦିଅ ପାପ ତାପ ।

ତୁମ ଦିବ୍ୟ ଜ୍ୟୋତି କର ପ୍ରଦାନ 

ଦୂରେ ଯାଉ ଅନ୍ଧକାର

ଅମା ଅନ୍ଧକାର କରହେ ବିଲୀନ

ଜାଳି ଦୀପ ଆଲୋକର ।

ମନ ମନ୍ଦିରରେ ତୁମକୁ ରଖୁଛି 

ଜାଳୁଛି ପ୍ରେମ ଦୀପାଳି 

ଗର୍ବ ଅହଙ୍କାର ପୋଡ଼ି ଜଳିଯାଉ

ସତ୍ ସଙ୍ଗେ ଯିବି ଝଳି ।

 

ହୃଦ ଅଙ୍ଗନରେ ଭକ୍ତି ଅର୍ଘ୍ୟ ଢ଼ାଳି 

ମୁକ୍ତି ମାର୍ଗ ସନ୍ଧାନିବି

ଅସାର ସଂସାରେ ଚଳିବି କିଭଳି 

ସତ୍କର୍ମରେ ମନ ଦେବି ।

ବରଷକେ ଥରେ ନଜଳୁ ପ୍ରଦୀପ 

ଜଳୁ ଅନୁତାପ ନୀରେ   

ପ୍ରତିକ୍ଷଣେ ପ୍ରଭୁ କରୁ ପ୍ରାୟଶ୍ଚିତ 

ସଦ୍ ବୁଦ୍ଧି ବିବେକରେ ।

ହୃଦୟ ଦୀପରେ ଆଖିର ଲୁହରେ

ସଂଯୋଗ ଭାଗ୍ୟ ସଳିତା  

ତିଳତିଳ କରି ଦୃଢ଼ ସଂକଳ୍ପରେ 

ଅଧ୍ୟାତ୍ମ ବଳେ ଧୀରତା ।

ହଟିଯିବ ସର୍ବ ସଂସାର ଲାଳସା

ଅଭିପ୍ରେତ ହେବ ଆଶା

ଅଭିନବ ଧାରେ ଧାବିବି ସହସା

ଘୁଞ୍ଚିବ ଘନ ତମସା ।

 

ସହଦେବଖୁଣ୍ଟା , ବାଲେଶ୍ଵର