ନବରଙ୍ଗପୁର—-(ମସିହା)ନବରଙ୍ଗପୁର ଜିଲ୍ଲା ଉମରକୋଟ ବ୍ଲକ ରାଜପୁର ପଞ୍ଚାୟତ ଅନ୍ତର୍ଗତ ସରକାରୀ ପ୍ରାଥମିକ ବିଦ୍ୟାଳୟ ,ଝୋଲା ଠାରେ ବିଦ୍ୟାଳୟର ସୁବର୍ଣ ଜୟନ୍ତୀ ସମାରୋହ ଅନୁଷ୍ଠିତ ହୋଇଯାଇଛି |ଉକ୍ତ ସମାରୋହରେ ମୁଖ୍ୟ ଅତିଥି ଭାବେ ଝରିଗାଁ ବିଧାୟକ ଇଂ ପ୍ରକାଶ ଚନ୍ଦ୍ର ମାଝୀ ଯୋଗ ଦେଇଥିଲେ | ୧୯୭୧ ମସିହାରେ ଉପାନ୍ତ ଅଞ୍ଚଳରେ ପ୍ରତିଷ୍ଠା ହୋଇଥିବା ଏକ ସରକାରୀ ପ୍ରଥମିକ ବିଦ୍ୟାଳୟ ନିଜର ସ୍ୱର୍ଣିମ ଜୟନ୍ତୀ ପାଳନ କରୁଛି ଏପରି ଖବର ଅନ୍ୟ ବିଦ୍ୟାଳୟମାନଙ୍କୁ ପ୍ରେରଣା ଦେବ ବୋଲି ନିଜ ବକ୍ତବ୍ୟରେ ବିଧାୟକ ଶ୍ରୀ ମାଝୀ କହିଥିଲେ | ସୁବର୍ଣ ଜୟନ୍ତୀ ଅବସରରେ ଶ୍ରୀ ମାଝୀ ବିଦ୍ୟାଳୟ ଭିତ୍ତିଭୂମିର ବିକାଶ ଏବଂ ଅତିରିକ୍ତ ଶ୍ରେଣୀ ଗୃହ ନିର୍ମାଣ ନିମନ୍ତେ ୫ଲକ୍ଷ ଆର୍ଥିକ ସହାୟତା ରାଶି ଘୋଷଣା କରିଥିଲେ |ସୁବର୍ଣ ଜୟନ୍ତୀ ଅବସରରେ ବିଦ୍ୟାଳୟ ପ୍ରତିଷ୍ଠା ବର୍ଷ ଠୁ ଅଦ୍ୟାବଧି କାର୍ଯ୍ୟକରିଥିବା ସମସ୍ତ ଶିକ୍ଷକ ମାନଙ୍କୁ ବିଧାୟକ ଶ୍ରୀ ମାଝୀ ମଞ୍ଚରେ ସମ୍ମାନିତ କରିଥିଲେ |୩ ନଂ ଜୋନର ଜିଲ୍ଲା ପରିସଦ ସଭ୍ୟା ଶ୍ରୀମତୀ ଡାଳିମ୍ବ ଭତ୍ରା , ସମିତି ସଭ୍ୟା ରୁକମଣୀ ଭତ୍ରା ,ରାଜପୁର ପଞ୍ଚାୟତ ସରପଞ୍ଚ ପବିତ୍ର ଭତ୍ରା , ପୂର୍ବତନ ସରପଞ୍ଚ ଗୌରଚାନ୍ଦ ମାଝୀ , ଭଣ୍ଡାରିଗୁଡା ସରପଞ୍ଚ ଉଦ୍ଧବ ନାୟକ ପ୍ରମୁଖ ଜନପ୍ରତିନିଧି ମାନେ ଉକ୍ତ ସଭାରେ ଉପସ୍ଥିତ ରହିଥିଲେ | ଉମରକୋଟ ବ୍ଲକର ଅତିରିକ୍ତ ଶିକ୍ଷାଧିକାରୀ ଶ୍ରୀଯୁକ୍ତ ପୁରୁଷୋତ୍ତମ ମାଝୀ ସ୍ୱତନ୍ତ୍ର ସମ୍ମାନିତ ଅତିଥି ଭାବେ କାର୍ଯ୍ୟକ୍ରମରେ ଯୋଗ ଦେଇଥିଲେ | ଉମରକୋଟ ବ୍ଲକ ପ୍ରାଥମିକ ଶିକ୍ଷକ ସଂଘର ସଭାପତି ଶ୍ରୀଯୁକ୍ତ ଦୀଲ୍ଲିପ ପଟ୍ଟନାୟକ ସମ୍ମାନିତ ଅତିଥି ଭାବେ କାର୍ଯ୍ୟକ୍ରମରେ ଯୋଗ ଦେଇଥିଲେ | କେନ୍ଦ୍ର ଓ ରାଜ୍ୟ ସରକାରଙ୍କ ଦ୍ୱାରା ପୁରସ୍କୃତ ତଥା ରାଜ୍ୟ ସାହିତ୍ୟ ଏକାଡେମି ସଦସ୍ୟ ଶ୍ରୀଯୁକ୍ତ ବଲ୍ଲଭ ରାଉତ ମୁଖ୍ୟ ବକ୍ତା ଭାବେ କାର୍ଯ୍ୟକ୍ରମରେ ଯୋଗଦେଇ ଉପାନ୍ତ ଅଞ୍ଚଳରେ ପ୍ରାଥମିକ ଶିକ୍ଷାର ଗୁରୁତ୍ୱ ଉପରେ ନିଜର ମତବ୍ୟକ୍ତ କରିଥିଲେ |ବିଦ୍ୟାଳୟର ସ୍ୱର୍ଣିମ ଜୟନ୍ତୀ ଅବସରରେ ରାଜପୁର, ସିଂଶାରୀ , ପୁଜାରିଭରଣ୍ଡି ଏବଂ ଜୀରାଗୁଡା କ୍ଲଷ୍ଟର ଅନ୍ତର୍ଗତ ବିଦ୍ୟାଳୟଗୁଡିକରେ କାର୍ଯ୍ୟ କରୁଥିବା ବରିଷ୍ଠ ପ୍ରଧାନ ଶିକ୍ଷକ ଓ ପ୍ରଧାନ ଶିକ୍ଷୟତ୍ରୀମାନଙ୍କ ତ୍ୟାଗ ଓ କର୍ତ୍ତବ୍ୟ ନିଷ୍ଠାକୁ ବିଧାୟକ ଶ୍ରୀ ମାଝୀ ଉଚ୍ଚ ପ୍ରଶଂସା କରିବା ସହ ସେମାନଙ୍କୁ ମାନପତ୍ର ପ୍ରଦାନ କରିଥିଲେ | ଏହି ଅବସରରେ ବିଦ୍ୟାଳୟର ବାର୍ଷିକ କ୍ରୀଡାରେ ଭାଗ ନେଇ ଥିବା ସଫଳ କୃତୀ ପ୍ରତିଯେଗୀମାନଙ୍କୁ ପରିଚାଳନା କମିଟିର ସଭାପତି ଶ୍ରୀ ଚୈତନ ଏବଂ ରାଜପୁର କ୍ଲଷ୍ଟରର ସିଆରସିସି ଶ୍ରୀ ମନୋଜ କୁମାର ବେହେରା ମାନପତ୍ର ଏବଂ ଟ୍ରଫି ପ୍ରଦାନ କରିଥିଲେ |ସ୍ୱର୍ଣିମ ଜୟନ୍ତୀ ଅବସରରେ ଉମରକୋଟ ବ୍ଲକ ଅନ୍ତର୍ଗତ ବିଭିନ୍ନ କ୍ଲଷ୍ଟରର ଛାତ୍ରଛାତ୍ରୀମାନଙ୍କ ଦ୍ୱାରା ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା | ଏହି ସାଂସ୍କୃତିକ କାର୍ଯ୍ୟକ୍ରମକୁ ଶତାଧିକ ଦର୍ଶକ ଉପଭୋଗ କରିଥିଲେ |କାର୍ଯ୍ୟକ୍ରମକୁ କରଲବେଡା ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ସଂଚାଳନ କରିଥିବା ବେଳେ ଝୋଲା ପ୍ରାଥମିକ ବିଦ୍ୟାଳୟର ପ୍ରଧାନଶିକ୍ଷକ ଶ୍ରୀଯୁକ୍ତ ଅନ୍ନଦା ପ୍ରସାଦ ଭୋଇ ସମସ୍ତ ଅତିଥି ,ଛାତ୍ର ଛାତ୍ରୀ ଏବଂ ଆଗନ୍ତୁକମାନଙ୍କୁ ଧନ୍ୟବାଦ ଅର୍ପଣ କରିଥିଲେ |