ଭବାନୀପାଟଣା ତା : 07.08.2023 :- 77ତମ ସ୍ଵାଧୀନତା ଦିବସ ଜିଲ୍ଲା ସ୍ତରୀୟ ଉତ୍ସବ ନିମନ୍ତେ ଆଜି ଭବାନୀପାଟଣା ଠାରେ ସ୍କୁଲ ଓ କଲେଜ ସ୍ତର ରେ ବିଭିନ୍ନ ପ୍ରତିଯୋଗୀତା ଅନୁଷ୍ଠିତ ହୋଇଯାଇଛି । ସହରର ବିଭିନ୍ନ ବିଦ୍ୟାଳୟ ଯଥା ପ୍ରାଥମିକ , ଉଚ୍ଚ ପ୍ରାଥମିକ ଓ ଉଚ୍ଚ ବିଦ୍ୟାଳୟ ଉଭୟ ସରକାରୀ ଓ ବେସରକାରୀ ଅନୁଷ୍ଠାନର ମନୋନୀତ ଛାତ୍ରଛାତ୍ରୀ ସ୍ଥାନୀୟ ମାଣିକେଶ୍ବରୀ ହାଇସ୍କୁଲ ଠାରେ ସମାବେଶ ହୋଇ ଚିତ୍ରାଙ୍କନ , ସଙ୍ଗୀତ , ପ୍ରବନ୍ଧ ଓ ବକ୍ତୃତା ପ୍ରତିଯୋଗିତାରେ ଭାଗ ନେଇଥିଲେ । ସେଭଳି ମହାବିଦ୍ୟାଳୟ ସ୍ତର ପ୍ରତିଯୋଗିତାରେ ସ୍ଥାନୀୟ କଳାହାଣ୍ଡି ବିଶ୍ୱବିଦ୍ୟାଳୟ ଠାରେ ଅନୁଷ୍ଠିତ ହୋଇଥିଲା ଏବଂ ବିଭିନ୍ନ କଲେଜ , ହାଇସ୍କୁଲ ସ୍ତରର ମନୋନୀତ ଛାତ୍ରଛାତ୍ରୀ ମାନେ ପ୍ରବନ୍ଧ ଓ 
ବକ୍ତୃତା ପ୍ରତିଯୋଗିତାରେ ଭାଗ ନେଇଥିଲେ । ମାଣିକେଶ୍ବରୀ ହାଇସ୍କୁଲ ଭାରପ୍ରାପ୍ତ ପ୍ରଧାନ ଶିକ୍ଷକ ରବି କାନୁନଗୋ ଏବଂ ବିଶ୍ବବିଦ୍ୟାଳୟର କୁଳପତି ସଞ୍ଜୟ ଶତପଥୀ ଏହି ପ୍ରତିଯୋଗୀତାକୁ ଶ୍ରୁଙ୍ଖଳିତ ଓ ନିରପେକ୍ଷ ରୂପେ କରିବାର ସମସ୍ତ ପ୍ରୟାସ କରିଥିଲେ । ବିଦ୍ୟାଳୟ ସ୍ତରର ପ୍ରତିଯୋଗିତାରେ ବିଚାରକ ରୂପେ ପ୍ରଭାସ ଚନ୍ଦ୍ର ମିଶ୍ର , ଜଗନ୍ନାଥ ତ୍ରିପାଠୀ , ଭୀମସେନ ସାହୁ , ରମେଶ ଚନ୍ଦ୍ର ସିଂ, ଶୁଭେନ୍ଦୁ ଶେଖର ବେହେରା , ପ୍ରତାପ ଚନ୍ଦ୍ର ଦାସ , ଯୁଧିଷ୍ଠିର ମୁଦୁଲି , ମୁକୁନ୍ଦ ରେଡ୍ଡୀ , ତରୁଣ ମହାପାତ୍ର , ସରସ୍ଵତୀ ସାହୁ , ଦଧିଚନ୍ଦ୍ର ସାହୁ , ନାରାୟଣ ସାହୁ , ରାଜେନ୍ଦ୍ର ସାହୁ , ସଂଜୀବ ଶର୍ମା , ଧୀରେନ୍ଦ୍ର ପଣ୍ଡା ପ୍ରମୁଖ ସହଯୋଗ କରିଥିଲେ । ଚଳିତ ବର୍ଷ ମାଣିକେଶ୍ବରୀ ହାଇସ୍କୁଲ ଠାରେ ବହୁ ସଂଖ୍ୟାରେ ଛାତ୍ରଛାତ୍ରୀ ସମାବେଶ ହୋଇ ଉତ୍ସାହର ସହ ପ୍ରତିଯୋଗିତାରେ ଭାଗ ନେଇଥିଲେ ଏବଂ ଏଥିରେ ମାଣିକେଶ୍ବରୀ ସ୍କୁଲର ଏନ.ସି.ସି. ଛାତ୍ର ଓ ଚତୁର୍ଥ ଶ୍ରେଣୀ କର୍ମଚାରୀ ସହଯୋଗ କରିଥିଲେ । ଜିଲ୍ଲାପ୍ରଶାସନ ତଥା ଜିଲ୍ଲା ସୂଚନା ଓ ଲୋକସମ୍ପର୍କ ବିଭାଗର ମିଳିତ ଆନୁକୂଲ୍ୟରେ ଡି.ଆଈ.ପି.ଆର.ଓ ଶ୍ରୀ ମନୋଜ କୁମାର ବେହେରାଙ୍କ ପ୍ରତ୍ୟକ୍ଷ ତତ୍ତ୍ଵାବଧାନରେ ଏହି ସମସ୍ତ ପ୍ରତିଯୋଗିତା ଅନୁଷ୍ଠିତ ହୋଇଥିଲା ।
ମସିହା ନିୟୁଜ୍ ସର୍ଭିସ୍
