ଜଗନ୍ନାଥ ତୁମେ ପରଂବ୍ରହ୍ମ
ଚାରି ଧାମ ମଧ୍ୟେ ଶ୍ରେଷ୍ଠ ତୋର ଧାମ
ପବିତ୍ର ପୁରୁଷୋତ୍ତମ,
ସର୍ବବ୍ୟାପି ତୁହି ନିରାକାର ହୋଇ
ଜୟ ଜୟ ପରଂବ୍ରହ୍ମ l
ଭକ୍ତର ଭକ୍ତିରେ ହୋଇଥାଅ ପ୍ରଭୁ
ଅରୂପରୁ ରୂପଧାରୀ,
ଅନ୍ତରଙ୍ଗ ହୋଇ ପାଖେ ପାଖେ ରହି
ନାନା ରୂପେ ଲୀଳା କରି l
ଚର୍ମ ଚକ୍ଷୁ ସବୁ ହୁଅଇ ପବିତ୍ର
ଦେଖୁଥିଲେ ତୋର ରୂପ,
କୋଟିଏ ଜନ୍ମର ପୂଣ୍ୟ ମିଳିଥାଏ
କଟିଯାଏ ସବୁ ପାପ l
ସମସ୍ତ ଧର୍ମର ପୀଠ ସ୍ଥଳୀ ତୁହି
ଯୁଗେ ଯୁଗେ ତୋ ମହିମା
ଭାବ ବିନୋଦିଆ ଭାବର ଠାକୁର
ସର୍ବ ମଙ୍ଗଳ ମଣିମା l
କୃପାସିନ୍ଧୁ ପ୍ରଭୁ ଆହେ ଦୀନବନ୍ଧୁ
ଅନାଥର ତୁହି ନାଥ,
ଭବ ସାଗରରୁ ପାରିକର ପ୍ରଭୁ
ଚକାଡ଼ୋଳା ଜଗନ୍ନାଥ l
ପ୍ରଶାନ୍ତ କୁମାର ଶତପଥୀ
ଛତ୍ରପୁର, ଗଞ୍ଜାମ
