ବିଶ୍ବ ମହିଳା ଦିବସରେ ମହିଳାଙ୍କୁ ମିଳିଲା ସମ୍ମାନ
ବାଲେଶ୍ବର,୦୩/୩/୨୫- ଜନହିତ ଯୁବକ ସଂଘ, ବାଲେଶ୍ବର ଏକ ଅଗ୍ରଣୀ ସମାଜସେବା ସଂଗଠନ । ଏହି ସଂଗଠନର ସମାଜସେବା କାର୍ଯ୍ୟ କେବଳ ବାଲେଶ୍ବର ଜିଲ୍ଲାରେ ସୀମିତ ନାହିଁ, ରାଜ୍ୟର ବିଭିନ୍ନ ଜିଲ୍ଲାରେ କାର୍ଯ୍ୟ କରୁଛି । ସେବା ମାଧ୍ୟମରେ ଗରିବ ଜନତାଙ୍କର ବନ୍ଧୁ ପାଲଟିଛି ସଂଗଠନ । ନିଜ ଅଞ୍ଚଳ ତଥା ବିଭିନ୍ନ ଅଞ୍ଚଳର ଗରିବ, ଅସହାୟ, ନିରାଶ୍ରୟ ଇତ୍ୟାଦି ଲୋକ ମାନଙ୍କ ପାଖରେ ପହଞ୍ଚି ଯଥା ସମ୍ଭବ ସେବା ଯୋଗାଇ ଦେବାରେ ନିଜର ଦକ୍ଷତା ପ୍ରତିପାଦନ କରିଚାଲିଛି । ସୋସିଆଲ ମିଡ଼ିଆ ଠାରୁ ଆରମ୍ଭ କରି ଚାରିଆଡ଼େ ସଂଗଠନର ସେବା କାର୍ଯ୍ୟକୁ ନେଇ ଚର୍ଚ୍ଚା । ସଂଗଠନର ଉପଦେଷ୍ଟା ପଦବୀ ମଣ୍ଡନ କରିଛନ୍ତି ଭଉଣୀ କୁଞ୍ଜଲତା ମାହୁଁନ୍ତ । ତାଙ୍କର ସମାଜସେବା କାର୍ଯ୍ୟ ଏତେ ମାତ୍ରାରେ ସମ୍ପ୍ରସାରିତ ଯେ, ଯେଉଁଥିରେ ଜନସମାଜ ଆଶ୍ଚର୍ଯ୍ୟ ଚକିତ । ଭଉଣୀ କୁଞ୍ଜଲତାଙ୍କ ସମାଜସେବା କାର୍ଯ୍ୟରେ ମୁଗ୍ଧ ହୋଇ ବିଶ୍ବ ମହିଳା ଦିବସରେ ନିମ୍ବକାଠ ପାନିଆ ଦ୍ବାରା କଟକ ଟାଉନ ହଲ୍ ପରିସରରେ ଆୟୋଜିତ ଆମ ସାଥିରେ ପରିବାର ସଭା ମଞ୍ଚରେ ” ଆମ ସାଥିରେ ଶ୍ରୀ ସମ୍ମାନ ” ରେ ସମ୍ମାନିତ ହୋଇ ବାଲେଶ୍ବର ଜିଲ୍ଲାର ଗୌରବ ବୃଦ୍ଧି କରିଛନ୍ତି । ଶ୍ରୀମତୀ ମାହୁଁନ୍ତଙ୍କ ଘର ଖଇରା ବ୍ଲକ ଅଞ୍ଚଳରେ । ସଂଗଠନର ଜଣେ ଦକ୍ଷ ଉପଦେଷ୍ଟା ଭାବେ ସମସ୍ତଙ୍କ ପ୍ରତି ଯେପରି ତାଙ୍କ ଉପଦେଶ ବହୁ ଗୁରୁତ୍ୱପୂର୍ଣ୍ଣ ସେହିପରି ଜଣେ ଦକ୍ଷତା ସମ୍ପନ୍ନ ସମାଜସେବୀ ଭାବେ ମଧ୍ୟ ଜନସାଧାରଣଙ୍କ ପାଇଁ ତାଙ୍କ ସେବା ବହୁ ମୂଲ୍ୟବାନ । ନିଜର ପାରିବାରିକ ଜଞ୍ଜାଳ ସତ୍ତ୍ୱେ ବି ସମାଜସେବା କାର୍ଯ୍ୟରେ ବ୍ରତୀ ଅଛନ୍ତି । ଏହି ସମାଜସେବା କାର୍ଯ୍ୟ ତାଙ୍କୁ ନୂତନ ଦିଗଦର୍ଶନ ଆଣିଦେଇଛି । ବହୁ ପ୍ରତିଭାର ଅଧିକାରିଣୀ ସେ । ବର୍ତ୍ତମାନ ଭଉଣୀ କୁଞ୍ଜଲତା ” ମୋ ଅନୁଷ୍ଠାନ ସାହିତ୍ୟ ସଂସଦ ” ର କାର୍ଯ୍ୟକାରୀ ସଭାପତି ଭାବେ କାର୍ଯ୍ୟ ନିର୍ବାହ କରୁଛନ୍ତି । ମୋ ଅନୁଷ୍ଠାନ ତରଫରୁ ଆୟୋଜିତ ପ୍ରତ୍ୟେକ ସମାଜସେବା କାର୍ଯ୍ୟରେ ନିଜକୁ ସାମିଲ କରି ଅନୁଷ୍ଠାନର ଗୌରବ ବୃଦ୍ଧି କରି ଚାଲିଛନ୍ତି । ନିଜର ସୁ ପ୍ରତିଭା ପାଇଁ ରାଜ୍ୟର ବହୁ ଅନୁଷ୍ଠାନ କରିଛି କୋଳାଗ୍ରତ ଓ ଦେଉଛି ସମ୍ମାନ । ତାଙ୍କ ସମ୍ବର୍ଦ୍ଧନାରେ ମୋ ଅନୁଷ୍ଠାନ ବାସ୍ତବରେ ଗର୍ବିତ ଓ ଆନନ୍ଦିତ । ଏ ଖବର ଶୁଣି ବହୁ ଶୁଭେଚ୍ଛୁ ଓ ଆତ୍ମୀୟ ସ୍ବଜନ ମାନଙ୍କ ଶୁଭେଚ୍ଛା ଏବଂ ଅଭିନନ୍ଦନର ଶୁଅ ଛୁଟିବାରେ ଲାଗିଛି । ଆଗକୁ ଆହୁରି ଉଚ୍ଚକୁ ଯାଆନ୍ତୁ ବୋଲି ସମ୍ପୃକ୍ତ ଅଞ୍ଚଳବାସୀ ଆଶୀର୍ବାଦ ପ୍ରଦାନ କରିଛନ୍ତି ।।
ବାଲେଶ୍ବରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
