ଦୁହିତା
ସଂସାରରେ ନାରୀ ଅଟେ ମହାଶକ୍ତି
ସ୍ନେହମୟୀ ପ୍ରେମମୟୀ
ସୃଷ୍ଟି କାରିଣୀ ସେ ସଂହାର କାରିଣୀ
ଧୈର୍ଯ୍ୟ ଶାନ୍ତି କ୍ଷମାମୟୀ ॥
ସମୟ।ନୁଯାୟୀ ଅନେକ ରୂପରେ
ସଂସାର ନାବ ଚାଳିନୀ
ଲକ୍ଷ୍ମୀ ରୂପେ କନ୍ୟା ବନିତା ଦୁହିତା
ଭଗିନୀ ଜାୟା ଜନନୀ ॥
ସବୁ ରୁପରେ ସେ ନିଭାଏ କରମ
ଉତ୍ତମ ପରଶ ଦେଇ
ପିତା ଗୃହେ ବଢେ ଅଲିଅଳି ହୋଇ
ହୃଦୟ ସଂଙ୍ଖାଳି ହୋଇ ॥
ଯୋଉବନ ବେଳେ ସ୍ଵାମୀ ହାତ ଧରି
ନୂଆ ସଂସାର ଗଢଇ
ସେପାଇଁ ଦୁନିଆଁ ଝୁରଇ ତାହାକୁ
ଶାସ୍ତ୍ର ପ୍ରମାଣ କରଇ ॥
ସୁଖ ଦୁଃଖ ହାନୀ ସବୁକୁ ଆବୋରି
ଜଳଇ ସଳିତା ହୋଇ
ଶାନ୍ତି ମୈତ୍ରୀ ପ୍ରୀତି ଧୈର୍ଯ୍ୟ ଶକ୍ତି କ୍ଷମା
ସଭିଙ୍କୁ ଆଲୋକ ଦେଇ ॥
ପିତାମାତା ନାମ ଉଜ୍ବଳ କରଇ
ତ୍ୟାଗ ମମତାକୁ ବରି
ଦୁଇ କୁଳ ପାଇଁ ସମର୍ପିତ ହୋଇ
ଜୀବନକୁ ବାଜି କରି ॥
ଜଳାଞ୍ଜଳି ଦେଇ ନିଜ ସୁଖଶିରି
ସମାଜେ ସଂସାର ଗଢେ
ପୁତ୍ର କନ୍ୟା ସ୍ୱାମୀ ଶାଶୁ ଶ୍ୱଶୁରଙ୍କ
ସେବାରେ ଆଗକୁ ବଢେ ॥
ଦୁହିତା ହୋଇ ସେ ଦୁଇ କୁଳହିତେ
ନିଜକୁ ସମର୍ପି ଥାଇ
ପିତା ଗୃହେ ତାର ଏନ୍ତୁଡ଼ି ଜଳଇ
ସ୍ଵାମୀଗୃହେ ଜଳେ ଜୁଇ ॥
ଅବୋଧ ମାନବ ଅନ୍ୟାୟ ଅନୀତି
ତାଉପରେ କର ନାହିଁ
ତାଆଖିର ଲୁହେ ଧ୍ଵସଂ ହୋଇଯିବ
ସବୁ ତୁମ ଭିତ୍ତିଭୁଇଁ ॥
ରତିନାରାୟଣ ରାଉତ
ହରିଚନ୍ଦନପୁର, କେନ୍ଦୁଝର, ଓଡ଼ିଶା
