ଶ୍ରୀ ଗଣେଶ ବନ୍ଦନା
ନମୋ ବିଘ୍ନ ବିନାୟକ ଅଭୟ ବରଦ
ନମୋ ନମୋ ଗଣନାଥ ସଦା ଶିବ ସୁତ।।
ଶଙ୍କୁବର୍ଣ୍ଣ ପ୍ରଚଣ୍ଡ ହେ ଆଘ୍ରାଣ ଲୋଳୁପ
ଅମ୍ବିକେୟ ଅରବିନ୍ଦ ଦଣ୍ଡି ଗଜରୁପ।।
ଜ୍ଞାନର ଗରିଷ୍ଠ ଦେବ କଲ୍ୟାଣ ଦାୟକ
ମେରୁ ମନ୍ଦର ସ୍ବରୁପ ହେ ଚଣ୍ଡି ନାୟକ।।
ଅଜ୍ଞାନ ଅନ୍ଧକାର କରିଥାଅ ଦୂର
ଅଗ୍ରପୂଜ୍ୟ ଗଣପତି ଜ୍ଞାନର ଭଣ୍ଡାର।।
ସକଳ ଦେବତାଙ୍କର ଅଗ୍ରେ ବନ୍ଦନୀୟ
ସ୍ବର୍ଣ୍ଣବର୍ଣ୍ଣ ଗଜକର୍ଣ୍ଣ ହେ ମଙ୍ଗଳ ମୟ।।
ଭକ୍ତ ରକ୍ଷାକାରି ପ୍ରଭୁ ଗରବ ଗଞ୍ଜନ
ଲମ୍ବୋଦର ଧୂମକେତୁ ଗଜେନ୍ଦ୍ର ବଦନ।।
ମୁକୁତାର ହାର କଣ୍ଠେସଦା ବିରାଜଇ
କପାଳେ ଚନ୍ଦନ ବିନ୍ଦୁ ସୁନ୍ଦର ଦିଶଇ।।
ରକ୍ତ ମନ୍ଦାର ମାଳରେ ତନୁ ବିଭୂଷିତ
ଦେବ ଦୈତ୍ୟ ସେବନୀୟ ନିର୍ଗୂଣ ଆରକ୍ତ।।
ମୂଷିକ ବାହନ କୁନ୍ତଧାରି ବିଦ୍ୟାଧର
ଦୀର୍ଘବାହୁ ଲଡୁଧାରି ପ୍ରଭୁ ଗଣେଶ୍ଵର।।
ସୁନ୍ଦର ଯଜ୍ଞ ପଇତା କନ୍ଧେ ଶୋଭାପାଏ
ଗଣ୍ଡସ୍ଥଳରୁ ମଧୁପ ମକରନ୍ଦ ବହେ।।
ନମୋ ତ୍ରିଲୋକ ପୂଜିତ କୃପାକର ମୋତେ
ଅଜ୍ଞନକୁ କରି ଦୂର ଜ୍ଞାନ ଦିଅ କିଞ୍ଚିତେ।।
ଦୟାକର ଚତୁର୍ଭୂଜ ଗିରିଜା ନନ୍ଦନ
ଜନ୍ମେ ଜନ୍ମେ ତୁମ୍ଭ ପାଦେ ଗଲି ମୁଁ ଶରଣ।।
ମମତା ସାହୁ
ଗାଈଗାଁ,କଳାହାଣ୍ତି
