ନୂଆଖାଇ ତିହାର
କବି ରାମଚନ୍ଦ୍ର ମହାନ୍ତି
ଦାଣ୍ଡରେ ଶୁଭୁଛି ଘୁମୁରା ସୁର ,
ଗଣପର୍ବ ନୂଆଁଖାଇ ତିହାର ।
ସଭିଙ୍କୁ ସମ୍ମାନ ସହ ଜୁହାର ,
ଭେଟ ଘାଟ ଆମ ପ୍ରତି ବର୍ଷର ।
ସବୁଜ ଧରା ଆମର ,
ଶସ୍ୟ ଶ୍ୟାମଳରେ ଭରିଛି ପୃଥିବୀ
ବର୍ଷା ଋତୁ ହେଲା ପାର। ।
ଭାଦ୍ରବ ମାସରେ ଗଣେଶ ପୂଜା ,
ତହିଁ ପରେ ନୂଆଖାଇର ମଜା ।
ପଶ୍ଚିମ ଓଡ଼ିଶା ଚଳ ଚଞ୍ଚଳ ,
ଘରେ ଘରେ ଖୁସି କରଇ ଖେଳ।
ବରଷକୁ ଥରେ ଭେଟ
ଯେତେ ଦୁରେ ଥିଲେ ଆସିବ ନିଶ୍ଚୟ
ସୁଶୋଭିତ ବାଟ ଘାଟ। ।
କ୍ଷେତରେ ରହିଛି ଧାନର କେଣ୍ଡା ,
ହୋଇ ଅଛି ପ୍ରତି ଦୁଆରେ ବନ୍ଧା ।
ନୂଆ ଜାମା ଯୋଡ଼ ନୂଆ ଆଟିକା ,
ସଭିଙ୍କ ମସ୍ତକେ ଚନ୍ଦନ ଟିକା ।
ହୃଦୟେ ଇଷ୍ଟ ଦେବତା ,
ଅଭାବ ଜନିତ ଦୁଃଖ ଦୂର ହେଉ
ସାହା ହୁଅ ଲକ୍ଷ୍ମୀ ମାତା।।
ନୂଆ ଧାନ ଆଣି ଚୁଡ଼ାକୁ କୁଟି ,
କୁରେଇ ପତରେ ଭୋଗର ଭେଟି ।
ସମଲେଶ୍ଵରୀଙ୍କୁ କରି ଅର୍ପଣ ,
ଦେହୁରୀ ଜାନି କରନ୍ତି ମାଜଣ।
ବରଷଟା ସୁଖେ ବିତୁ ,
ଖାଦ୍ୟର ଅଭାବ ଦୂର ହୋଇଯାଉ
ଅଭାବ କଷଣ ହଟୁ ।।
ଧର୍ମ ଧାରଣା ସାମାଜିକ ବନ୍ଧନ,
ସହିତ କୃଷକ ଆନନ୍ଦ ମନ ।
ତିନି ଗୋଟି ସୂତ୍ରେ ଏକତା ରଜ୍ଜୁ ,
ନବାନ୍ନ ଭକ୍ଷଣ ଖୁସି ବିରାଜୁ ।
ଜଣାଏ ଇଷ୍ଟ ଦେବୀଙ୍କୁ ,
ମା” ସମଲାଇ ପଟଣାଇଶ୍ୱରୀ
ସୁରକ୍ଷା ଦିଅ ସଭିଙ୍କୁ।।
ନୂଆ ଜାମା ପିନ୍ଧି ଗୁରୁଜନଙ୍କୁ ,
ଜୁହାର ହୋଇବା ପରମ୍ପରାକୁ ।
କନିଷ୍ଠ ମାନଙ୍କ ଅଭିନନ୍ଦନ ,
କ୍ଷୀରି ପିଠା ଖାଇ ଉଷତ ମନ
ସଭିଙ୍କ ଆନନ୍ଦ ମନ ,
ଆସନ୍ତା ବରଷ ଭେଟ ହେବା ପାଇଁ
ଦେବୀପାଦେ କର ଧ୍ୟାନ।।
