ସ୍ମୃତିରେ ସ୍ମୃତିରେ ୨୦୨୨
କାଙ୍ଗାଳୀ ଚରଣ ସେଠୀ
ଡ଼ାଏରୀରୁ ଦୃଷ୍ଟି ଫେରେ
ଡୁବି ଯାଏ ଡିସେମ୍ଵର ମାସ
ଏଇ ଏବେ ଫିଟେଇବ ଜାନୁଆରୀ ଫାଇଲର ଫାଶ ।
ମକର ସଂକ୍ରାନ୍ତୀ ବୁଡ
ମନେପଡ଼େ ମାଘମାସ ଜାଡ
ଫଗୁଣର ଫଗୁ ବୋଳା
ରକ୍ତିମ ପଳାଶ କଢ଼ ।
କୋଇଲିର କୁହୁତାନ
ବଉଳ ବଉଳ ବାସ
ଚୋରା ଚଇତର ପ୍ରୀତି
ମଳୟ ମଳୟ ହସ ।
ବୈଶାଖ ନବାତପଣା
ବାସ ମଲ୍ଲୀ ଫୁଲମାନ
ଜ୍ୟେଷ୍ଠର ରଜ ମଉଜ
ଗ୍ରୀଷମ ଗ୍ରୀଷମ ଦିନ ।
ନୂଆ ଆଷାଢ଼ର ମଉସୁମୀ
କଦମ୍ବ କିଆ କେତକୀ
ଶ୍ରୀବଣେ ଶ୍ରୀବଣୀ ଝୁରେ
ମଦାଳସୀ ମାନସୀ ।
ଭୋଦୁଅ ଖୁଦୁରୁକୁଣୀ
ଆଶ୍ଵିନେ ଅଷ୍ଟଭୁଜା
କାର୍ତ୍ତିକରେ ଦୀପଦାନ
ମଗୁଶିରେ ଲକ୍ଷ୍ମୀପୂଜା ।
ସ୍ମୃତିରେ ସ୍ମୃତିରେ ପୌଷ
ପ୍ରୀତି ଗୀତି ସରିଲା ବାଇଶି
ନୂଆ ସମ୍ଭାବନା ନେଇ
ଆସିଯିବ କୋଡିଏ ତେଇଶି ।
ବର୍ତ୍ତଣ୍ଡା, ସୁକିନ୍ଦା, ଯାଜପୁର
,
