ଜିଲ୍ଲା ଆରକ୍ଷୀ ଅଧିକ୍ଷକଙ୍କ ନିର୍ଦ୍ଦେଶକ୍ରମେ ପୁଲିସ ଓ ଆରଟିଓର ମିଳିତ ହେଲମେଟ ଯାଞ୍ଚ ଅଭିଯାନ, ଟ୍ରାଫିକ ନିୟମ ପାଳନ ଉପରେ ଗୁରୁତ୍ୱ
ରାୟଗଡ଼ା: ଜିଲ୍ଲା ଆରକ୍ଷୀ ଅଧିକ୍ଷକ (ଏସ୍ପି)ଙ୍କ ନିର୍ଦ୍ଦେଶକ୍ରମେ ରାୟଗଡ଼ା ପୁଲିସ ଏବଂ ଆଞ୍ଚଳିକ ପରିବହନ କାର୍ଯ୍ୟାଳୟ (ଆରଟିଓ) ପକ୍ଷରୁ ଜିଲ୍ଲାର ବିଭିନ୍ନ ସ୍ଥାନରେ ମିଳିତ ଭାବେ ସ୍ୱତନ୍ତ୍ର ହେଲମେଟ ଯାଞ୍ଚ ଅଭିଯାନ କରାଯାଇଛି।
ଏହି ଅଭିଯାନର ମୁଖ୍ୟ ଉଦ୍ଦେଶ୍ୟ ଥିଲା ଦୁଇଚକିଆ ଯାନ ଚାଳକମାନଙ୍କ ମଧ୍ୟରେ ସଡ଼କ ସୁରକ୍ଷା ସଚେତନତା ବୃଦ୍ଧି କରିବା ଏବଂ ଟ୍ରାଫିକ ନିୟମର କଡ଼ାକଡ଼ି ପାଳନ ସୁନିଶ୍ଚିତ କରିବା। ଯାଞ୍ଚ ସମୟରେ ହେଲମେଟ ପରିଧାନ, ବୈଧ ଡ୍ରାଇଭିଂ ଲାଇସେନ୍ସ, ଯାନ ପଞ୍ଜୀକରଣ ପ୍ରମାଣପତ୍ର, ବୀମା ଓ ଅନ୍ୟାନ୍ୟ ଆବଶ୍ୟକ କାଗଜପତ୍ର ଯାଞ୍ଚ କରାଯାଇଥିଲା।
ଟ୍ରାଫିକ ନିୟମ ଉଲ୍ଲଂଘନ କରୁଥିବା ଚାଳକମାନଙ୍କ ବିରୋଧରେ ମୋଟର ଯାନ ଆଇନ ଅନୁଯାୟୀ ଆବଶ୍ୟକୀୟ ଜରିମାନା ଆଦାୟ କରାଯିବା ସହ ସେମାନଙ୍କୁ ସଡ଼କ ସୁରକ୍ଷା ଓ ହେଲମେଟ ବ୍ୟବହାରର ଗୁରୁତ୍ୱ ସମ୍ପର୍କରେ ସଚେତନ କରାଯାଇଥିଲା।
ଜିଲ୍ଲା ଆରକ୍ଷୀ ଅଧିକ୍ଷକ କହିଛନ୍ତି ଯେ, ହେଲମେଟ ପିନ୍ଧିବା କେବଳ ଆଇନଗତ ବାଧ୍ୟବାଧକତା ନୁହେଁ, ବରଂ ଏହା ଜୀବନ ରକ୍ଷାର ଏକ ପ୍ରଭାବଶାଳୀ ଉପାୟ। ସମସ୍ତ ଯାନଚାଳକଙ୍କୁ ଟ୍ରାଫିକ ନିୟମ ପାଳନ କରି ସୁରକ୍ଷିତ ଯାତାୟାତରେ ସହଯୋଗ କରିବାକୁ ସେ ଆହ୍ୱାନ କରିଛନ୍ତି।
ପୁଲିସ ଓ ଆରଟିଓ ବିଭାଗ ପକ୍ଷରୁ ସୂଚନା ଦିଆଯାଇଛି ଯେ, ସଡ଼କ ଦୁର୍ଘଟଣା ହ୍ରାସ ଏବଂ ଟ୍ରାଫିକ ଶୃଙ୍ଖଳା ସୁଦୃଢ଼ କରିବା ପାଇଁ ଆଗାମୀ ଦିନରେ ଏଭଳି ମିଳିତ ଯାଞ୍ଚ ଅଭିଯାନ ଜିଲ୍ଲାର ବିଭିନ୍ନ ସ୍ଥାନରେ ଜାରି ରହିବ।
ଗୌରୀ ପଟ୍ଟନାୟକ ଙ୍କ ରିପୋର୍ଟ୍
