ମୃତ୍ୟୁ
ମୃତ୍ୟୁ ଆସିଗଲେ ଥରି ଯାଏ ଛାତି
ଆସିଛି ନେବାକୁ ମୋତେ
ଜନମ ହୋଇଲେ ମରଣ ନିଶ୍ଚୟ
ଡରୁଛି କାହିଁକି ଏତେ
ପ୍ରଭୁର ଡାକରା ଆସିଛି ମୋ ପାଶେ
ଭେଟ ହେବ ପ୍ରଭୁ ସାଥେ
ମୃତ୍ୟୁ ଆସିଗଲେ…………..୧
ଶରୀର ନୁହଁଇ କାହାର ନିଜର
କାହିଁକି ନିଜର ଭାବ
ଆତ୍ମା ସାଥେ ଯଦି ଭାବ ରଖିଥିବୁ
ଦୁଃଖ କେବେ ନହୋଇବ
ସେହି ଏକା ପ୍ରଭୁ ଶରୀର ଭିତରେ
ରହିଛି ତୁମରି ସାଥେ
ମୃତ୍ୟୁ ଆସିଗଲେ…………..୨
ପଞ୍ଚଭୂତ ମିଶି ଗଢିଲେ ଶରୀର
ମାଆର ଗର୍ଭରେ ଆସି
ପ୍ରଭୁ ନିଜେ ଆସି ଘଟରେ ପ୍ରବେଶ
ଦେଖୁଛି ସବୁ ସେ ବସି
ମୋହ ଲାଗିଗଲା ଶରୀରକୁ ମୋର
ଜାବୁଡ଼ି ଧରେମୁଁ କେତେ
ମୃତ୍ୟୁ ଆସିଗଲେ ଥରି ଯାଏ ଛାତି
ଆସିଛି ନେବାକୁ ମୋତେ…………..୩
ସତ୍ୟରଞ୍ଜନ ସ୍ୱାଇଁ
ଅବଦଲପୁର, ଯାଜପୁର
