ନର୍ଲା: (ମ.ପ୍ର)ଜ୍ଞାନ ଜ୍ୟୋତି ସାବିତ୍ରୀବାଇ ଫୁଲେଙ୍କ ଜନ୍ମ ଜୟନ୍ତୀକୁ ଶିକ୍ଷକ ଦିବସ ଭାବେ ପାଳନ କରିଛି ଅଲ ଓଡିଶା ସିଡ୍ୟୁଲକାଷ୍ଟ ଫେଡେରେସନ କଳାହାଣ୍ଡି ନର୍ଲା ବ୍ଲକ । ଏହାସହ ବିଜୟ ଦିବସ ଓ ଶିକ୍ଷା ଦିବସ ପାଳିତ ହୋଇଯାଇଛି । ନର୍ଲା ପେସିଫିକ ପବ୍ଲିକ ସ୍କୁଲ ପରିସରରେ ଏନେଇ ଆୟୋଜିତ ଭବ୍ୟ ସମାରୋହରେ ଜିଲ୍ଲାର ବିଭିନ୍ନ ପ୍ରାନ୍ତରୁ ସଂଘର ସଦସ୍ୟ/ସଦସ୍ୟା ତଥା ଆମ୍ବେଦକରବାଦିମାନେ ଯୋଗ ଦେଇଥିଲେ । ପ୍ରଥମେ ଏକ ବିଶାଳ ଶୋଭାଯାତ୍ରାରେ ଅଲ ଓଡିଶା ସିଡ୍ୟୁଲକାଷ୍ଟ ଫେଡେରେସନର କାର୍ଯ୍ୟକର୍ତ୍ତା ଓ ସଦସ୍ୟମାନେ ସଭା ସ୍ଥଳକୁ ଆସି ପହଞ୍ଚିଥିଲେ । ନୂତନ ବର୍ଷ ୨୦୨୨ ପ୍ରାରମ୍ଭରେ ଆଜି ଶିକ୍ଷକ ଦିବସ ସହ ବିଜୟ ଦିବସ ପାଳନ କରାଯାଇଥିଲା । ନର୍ଲା ବ୍ଲକ ସିଡ୍ୟୁଲକାଷ୍ଟ ଫେଡେରେସନ ସଭାପତି ରଘୁନାଥ ଦୀପଙ୍କ ଅଧ୍ୟକ୍ଷତାରେ ଆୟୋଜିତ ଉକ୍ତ କାର୍ଯ୍ୟକ୍ରମରେ ଅତିଥି ଭାବେ ଅଲ ଓଡିଶା ସିଡ୍ୟୁଲକାଷ୍ଟ ଫେଡେରେସନ କଳାହାଣ୍ଡି ଜିଲ୍ଲା ସଭାପତି ଧନଞ୍ଜୟ ଦୀପ, ଅଧ୍ୟାପକ ଜିତେନ୍ଦ୍ର ସୁନା, ରମଣୀ ଦୁରିଆ, ରଜନୀକାନ୍ତ କୁମାର, କବିତା ବାଗ, ବିଜୟଲକ୍ଷ୍ମୀ ସ୍ବର୍ଣ୍ଣ, ବାସନ୍ତୀ ସତନାମି, ଡ଼ଃ ବିବେକାନନ୍ଦ ମହାନନ୍ଦ, ଅଭିରାମ ନନ୍ଦ, ଦେବେଶ୍ବର ସାଗର, ଏସ ସୁଜାତା, କାମରାଜ ଦୁରିଆ, ଅଇନଜିବୀ ଦିଗାମ୍ବର ଦୁରିଆ, ଜିତେନ୍ଦ୍ର କର, ଶ୍ରୀବତ୍ସ ତାଣ୍ଡି ଜ୍ୟୋର୍ତିମୟୀ ଜାଲ ଓ ଲିଙ୍ଗରାଜ ଆଜାଦ ପ୍ରମୁଖ ମଞ୍ଚାସୀନ ଥିଲେ। ପ୍ରାରମ୍ଭରେ ମହାପୁରୁଷମାନଙ୍କ ପ୍ରତିକୃତରେ ଦୀପ ପ୍ରଜ୍ବଳନ, ପୁଷ୍ପମାଲ୍ୟ ଅର୍ପଣ ସହ ତ୍ରିଶରଣ ପଞ୍ଚଶୀଳ ଗାନ କରାଯାଇଥିଲା । ଅତିଥିମାନେ ଆଜିର କାର୍ଯ୍ୟକ୍ରମର ଆଭିମୁଖ୍ୟ ଉପରେ ଆଲୋକପାତ କରିବାସହ ଦଳିତ ସମାଜ ଅଧିକ ଶସକ୍ତ ହେବାକୁ ଆହ୍ବାନ କରିଥିଲେ । ପ୍ରକାଶ ସାଗର, ସୁଷମା ସୁନା ଓ ଗୋପାଳ ଦାସ ମହାନନ୍ଦ ମଞ୍ଚ ପରିଚାଳନା କରିଥିଲେ । ଏହି ଅବସରରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।
ପ୍ରଦୀପ କୁମାର ଗଉଡ ନର୍ଲା ମସୀହା ପ୍ରତିନିଧି