ଘଟଣାସ୍ଥଳରେ ପହଞ୍ ଉଦ୍ଧାର କାର୍ଯ୍ୟ ତଦାରଖ କଲେ ବ୍ଲକ ଅଧ୍ୟକ୍ଷା
ଲାଞ୍ଜିଗଡ଼,୦୩/୦୩(ମନିସ)-ଜଣେ ଠିକାଦାରଙ୍କ କଥାରେ ପଡ଼ି ଅଧିକ ପାରିଶ୍ରମିକ ପାଇବା ଆଶାରେ ସେମାନେ ବାହାରିଥିଲେ କାମ କରିବାକୁ । କିନ୍ତୁ କାମ କରିବାକୁ ଯାଉଥିବାବେଳେ ହିଁ ରାସ୍ତାରେ ସେମାନଙ୍କୁ ବିପଦ ଛକି ବସିଥିଲା । ସେମାନେ ବସିଥିବା ପିକଅପ୍ ଭ୍ୟାନ ଚାଳକର ବେପରୁଆ ଗାଡ଼ି ଚାଳନା ସେମାନଙ୍କ ପାଇଁ ବିପଦ ଡାକି ଆଣିଥିଲା । 
ଭାରସାମ୍ୟ ହରାଇ ପିକଅପ୍ ଭ୍ୟାନଟି ଓଲଟି ପଡ଼ିବାରୁ ସେଥିରେ ବସିଥିବା ୨୬ ଜଣ ଶ୍ରମିକଙ୍କ ମଧ୍ୟରୁ ୧୮ ଜଣ ଗୁରୁତର ହୋଇଥିବାବେଳେ ଅନ୍ୟ ୮ ଜଣ ସାମାନ୍ୟ ଆହତ ହୋଇଛନ୍ତି । ଏଭଳି ଏକ ଲୋମହର୍ଷକ ଦୁର୍ଘଟଣା ଘଟିଛି କଳାହାଣ୍ଡି-ରାୟଗଡ଼ା ଜିଲ୍ଲା ସୀମାନ୍ତ ଝିଗିଡ଼ିଠାରେ । ସୂଚନାନୁଯାୟୀ, କଳାହାଣ୍ଡି ଜିଲ୍ଲା 
ଲାଞ୍ଜିଗଡ଼ ବ୍ଲକ ପୋଖରୀବନ୍ଧ ପଞ୍ଚାୟତର ଜାରେଙ୍ଗପଟା, ଜିଞ୍ଜେରଗୁଡ଼ା, ଇରକୁଲି ଓ ବରାଘାଟି ଗାଁର ୨୬ ଜଣ ଶ୍ରମିକ ଏକ ପିକଅପ୍ ଭ୍ୟାନରେ ବସି ରାୟଗଡ଼ା ଜିଲ୍ଲା ମୁନିଗୁଡ଼ା ବ୍ଲକ ଦହିଖାଲକୁ ନୀଳଗିରି ଗଛ କାଟିବାକୁ ଯାଉଥିଲେ । ରାୟଗଡ଼ା ଜିଲ୍ଲା ବିଷମକଟକର ବାସୁ ବାବୁ ନାମକ ଜଣେ ମାଲିକ ସେମାନଙ୍କୁ ନୀଳଗିରି ଗଛ କାଟିବାକୁ ନେଉଥିବାବେଳେ ଝିଗିଡ଼ି ନିକଟରେ ଭାରସାମ୍ୟ ହରାଇ ପିକଅପ୍ ଭ୍ୟାନଟି ଓଲଟି ପଡ଼ିଥିଲା 
। ଫଳରେ ସେଥିରେ ବସିଥିବା ସମସ୍ତ ୨୬ଜଣ ଯାକ ଶ୍ରମିକ ଛିଟିକି ପଡ଼ିଥିଲେ । ସେମାନଙ୍କୁ ପୁଲିସ ଓ ଆମ୍ବୁଲାନ୍ସ ସହାୟତାରେ ବିଶ୍ୱନାଥପୁର ଓ ଅମ୍ବାଦଳା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଥିବାବେଳେ ୧୮ଜଣ ଗୁରୁତରଙ୍କୁ ଭବାନୀପାଟଣା ଓ ରାୟଗଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି । ସେହିପରି ୮ ଜଣ ଆହତ ବିଶ୍ୱନାଥପୁର ଓ ଅମ୍ବାଦଳା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଚିକିତ୍ସିତ ହେଉଛନ୍ତି । ଏ ସଂପର୍କରେ ଖବର ପାଇ 
ଲାଞ୍ଜିଗଡ଼ ବ୍ଲକ ଅଧ୍ୟକ୍ଷା କମଳା ପାତ୍ର ଓ ତାଙ୍କ ପ୍ରତିନିଧି ହରିଶଙ୍କର ପାତ୍ର ଦୁର୍ଘଟଣାସ୍ଥଳ ପରିଦର୍ଶନ କରିବା ସହିତ ଅମ୍ବାଦଳା ଓ ବିଶ୍ୱନାଥପୁର ଡାକ୍ତରଖାନା ଯାଇ ଗୁରୁତର ଆହତ ଓ ଆହତଙ୍କ ଉଦ୍ଧାର ଓ ଚିକିତ୍ସା କାର୍ଯ୍ୟର ତଦାରଖ କରିଥିଲେ । ସେହିପରି ସାମ୍ବାଦିକ ଓ ସମାଜସେବୀ ସନ୍ତୋଷ ତୁଳ, ପୋଖରୀବନ୍ଧ ସରପଞ୍ଚ ସସ୍ମିତା ମାଝୀ ଓ ତାଙ୍କ ପ୍ରତିନିଧି କର୍ଣ୍ଣ ମାଝୀ, ଲକ୍ଷ୍ମୀକାନ୍ତ ବେହେରା, ଜଗା ପ୍ରଧାନୀ ପ୍ରମୁଖ ଗୁରୁତରଙ୍କୁ ଉଦ୍ଧାର ତଥା ସ୍ଥାନାନ୍ତର କାର୍ଯ୍ୟରେ ସହଯୋଗ କରିଥିଲେ । ଏନେଇ ଅମ୍ବାଦଳା ଥାନାରେ ଏକ ମାମଲା ରୁଜୁ ହୋଇଥିବାବେଳେ ଦୁର୍ଘଟଣା ପରେ ଚାଳକ ଜଣକ ପୁଲିସ ପାଖରେ ଆତ୍ମସମର୍ପଣ କରିଥିବା ଜଣାପଡିଛି ।
ଲାଞ୍ଜିଗଡ଼ ରୁ ସୁଶୀଲ କୁମାର ବାଗ ଙ୍କ ରିପୋର୍ଟ
