ଲାଞ୍ଜିଗଡ,୦୯/୦୩(ମ.ନି.ସ)-ଲାଞ୍ଜିଗଡ ଗ୍ରାମପଞ୍ଚାୟତର ନବନିର୍ବାଚିତ ସରପଞ୍ଚ ସରସ୍ୱତୀ ମୁଣ୍ଡା ଆଜି ପଦ ଓ ଗୋପନୀୟତାର ଶପଥ ନେବା ସହିତ ବିଧିବଦ୍ଧ ଭାବେ ସରପଞ୍ଚ ଭାବେ ଦାୟିତ୍ୱ ଗ୍ରହଣ କରିଛନ୍ତି । ଆଜି ସେ ନୂତନ ସରପଞ୍ଚ ଭାବେ ଦାୟିତ୍ୱ ଗ୍ରହଣ କରିବା ପରେ ଲାଞ୍ଜିଗଡ ପଞ୍ଚାୟତର ବିଭିନ୍ନ ସମସ୍ୟାର ସମାଧାନ ଦିଗରେ ପଦକ୍ଷେପ ନେବେ ବୋଲି ନିଜ ପ୍ରତିକ୍ରିୟାରେ କହିଛନ୍ତି ।
ସେ ଦାୟିତ୍ୱ ଗ୍ରହଣ କରିବା ପରେ ଆଜି ପଞ୍ଚାୟତ କର୍ତ୍ତୃପକ୍ଷଙ୍କ ସମେତ ବିଭିନ୍ନ ପଡାର ମାନ୍ୟଗଣ୍ୟ ବ୍ୟକ୍ତିମାନେ ତାଙ୍କୁ ସ୍ୱାଗତ ସମ୍ବର୍ଦ୍ଧନା ଜଣାଇଥିଲେ । ସୂଚନାଯୋଗ୍ୟ, ଜଣେ ଆଦିବାସୀ ମହିଳା ନେତ୍ରୀ ଭାବେ ଲାଞ୍ଜିଗଡ ଅଞ୍ଚଳରେ ଦୀର୍ଘ ବର୍ଷ ଧରି କାର୍ଯ୍ୟ କରୁଥିବା ସରସ୍ୱତୀ ପୂର୍ବରୁ ଲାଞ୍ଜିଗଡ ବ୍ଲକ ମହିଳା ବିଜୁ ଜନତାଦଳର ସଭାନେତ୍ରୀ ଥିଲେ । ଦଳୀୟ କାର୍ଯ୍ୟ ବ୍ୟତୀତ ସ୍ଥାନୀୟ ଅଞ୍ଚଳର ଲୋକଙ୍କ ଦୁଃଖସୁଖରେ ଠିଆ ହୋଇ ସେ ସାଧାରଣ ଜନତାଙ୍କ ପ୍ରିୟପାତ୍ର ହୋଇ ପାରିଥିବାବେଳେ ଏଥର ଲାଞ୍ଜିଗଡ ପଞ୍ଚାୟତ ଅଞ୍ଚଳବାସୀ ତାଙ୍କୁ ସରପଞ୍ଚ ଭାବେ ନିର୍ବାଚିତ କରିଛନ୍ତି ।
ଲାଞ୍ଜିଗଡରୁ ସୁଶୀଲ କୁମାର ବାଗଙ୍କ ରିପୋର୍ଟ୍
