ବାଲେଶ୍ଵର,୨୩/୭/୨୩- ସରକାର ରାସ୍ତା ନିର୍ମାଣ ଓ ମରାମତି ବାବଦରେ ବାର୍ଷିକ କୋଟି କୋଟି ଟଙ୍କା ବ୍ଯୟବରାଦ କରୁଛନ୍ତି, ହେଲେ ସୁଧିରୁ ନାହିଁ ରାସ୍ତାର ଅବସ୍ଥା । ଲୋକମାନେ ହେଉଛନ୍ତି ହଇରାଣ ଓ ହରକତ । ବିପଦ ପୂର୍ଣ୍ଣ ଅବସ୍ଥାରେ କରୁଛନ୍ତି ଯାତାୟାତ । କେତେବେଳେ ଯେ କାହାର ଜୀବନ ଯିବ ତାହା ହେବ ନାହିଁ କହି । ଏପରି ଏକ ଦୃଶ୍ୟ ଦେଖିବାକୁ ମିଳିଛି ଖଇରା-
ସାରକୋଣା-ଫତେପୁର ଓ ମୟୂରଭଞ୍ଜକୁ ସଂଯୋଗ କରୁଥିବା ରାସ୍ତା କ୍ଷେତ୍ରରେ । ଖଇରା ଠାରୁ ଫତେପୁର ରାସ୍ତା ପ୍ରାୟ ୭ କିମି ହେଵ । ଦୈନିକ ଏହି ରାସ୍ତା ଦେଇ ମୟୂରଭଞ୍ଜ ଜିଲ୍ଲାକୁ ଯାତ୍ରୀବାହୀ ଗାଡି, ମାଲବାହୀ ଗାଡି, ବାଇକ୍ ଯାତାୟାତ କରିବା ସହିତ ପାଦରେ ଚାଲିଚାଲି ମଧ୍ୟ ବହୁତ ଲୋକ ଯାତାୟତ କରୁଛନ୍ତି ମୟୂରଭଞ୍ଜକୁ । କିନ୍ତୁ ଖଇରା ପଞ୍ଚାୟତ ଠାରୁ ମୁକ୍ତାବେଗୁନିଆ, ସାରକୋଣା, ବାଙ୍ଗୁରୁ, ମିଟୁଆଣି, ନୂଆଗାଁବଡ଼ ଦେଇ ମୟୂରଭଞ୍ଜ ଜିଲ୍ଲା ସୀମା ପର୍ଯ୍ୟନ୍ତ ରାସ୍ତାଟି ଖାଲଖମାରେ ଭର୍ତ୍ତି ହୋଇଛି । ବିଭିନ୍ନ ପ୍ରକାର ଯାନବାହନ ସହିତ ପଥଚାରୀ ମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉ ଥିବାର ନଜରକୁ ଆସିଛି । ବର୍ଷ ବର୍ଷ ଧରି ଖାଲଖମା ହୋଇ ପାରୁନି ମରାମତି, ତାହେଲେ ରାସ୍ତା ନିର୍ମାଣ ଓ ମରାମତି ବାବଦରେ ଆସୁଥିବା ଅର୍ଥ ଯାଉଛି କୁଆଡେ ? ଅଥଚ 
ଆଳଦା-ଡୁଙ୍ଗୁରା ରାସ୍ତାର ପଳସା ଠାରେ ଭଲଥିବା କଂକ୍ରିଟ ଢଳେଇ ଉପରେ ଚାଲିଛି କଂକ୍ରିଟ ଢଳେଇ କାମ । ଏହା କ’ଣ ନବୀନ ସରକାରର ସ୍ବଚ୍ଛ ଶାସନର ନମୁନା ? ବାରମ୍ବାର ଖବରପ୍ରସାରଣ ପରେ ମଧ୍ୟ ସୁଧୁରୁ ନାହିଁ ଖଇରା ଓ ଔପଦା ବ୍ଲକର ରାସ୍ତା ଅବସ୍ଥା । ସତରେ ପ୍ରଶାସନ କେଡେ ନିର୍ଲଜ । ନିର୍ଲଜ ପ୍ରଶାସନ, ନେତା ଓ ବିଭାଗୀୟ ମନ୍ତ୍ରୀଙ୍କୁ ଲୋକେ କଲେଣି ଘୃଣା । ଯାହା ଆଗାମୀ ସାଧାରଣ ନିର୍ବାଚନରେ ଶାସକ ଦଳକୁ ମହଙ୍ଗା ପଡିବ ବୋଲି ବୁଦ୍ଧିଜୀବୀ ମହଲରେ ଆଲୋଚନା ଜୋର ଧରିଲାଣି । ଏପରି ସ୍ଥଳେ ସ୍ଥାନୀୟ ନେତା ଓ ବିଧାୟକ ଗଲେ କୁଆଡେ ? ଜନମତରୁ ଜଣାଯାଏ ନିଜ ନିଜ ବ୍ଲକର ଭାଗ୍ୟ ବିଧାତା ବୋଲାଉ ଥିବା ଶାସକ ଦଳର ଲୋକ ପ୍ରତିନିଧି କ’ଣ ଶୋଇ ପଡିଲେଣି ? କାହିଁକି ଦେଉ ନାହାନ୍ତି ଉଭୟ ବ୍ଲକ ରାସ୍ତା ପ୍ରତି ଦୃଷ୍ଟି ? ଆଗାମୀ ସାଧାରଣ ନିର୍ବାଚନ ନିମନ୍ତେ ଭୋଟର ମାନଙ୍କୁ ଭେଟିବାକୁ ଯିବେ ତ ? ପୁଣି ଦେବେ କେଉଁ ପ୍ରତିଶ୍ରୁତି ? ନିର୍ବାଚନ ସମୟରେ ଦେଇଥିବା ପ୍ରତିଶ୍ରୁତି କ’ଣ ପାଣିରଗାର ହୋଇ ରହିଗଲା ? ବିଭିନ୍ନ ସମୟରେ ବିଭିନ୍ନ ମଞ୍ଚ ଓ ସ୍ବେଚ୍ଛାସେବୀ ସଙ୍ଗଠନ ମାନେ ବ୍ଲକର ବିଭିନ୍ନ ସମସ୍ୟା ବାବଦରେ ବିଭାଗୀୟ ପ୍ରଶାସନ, ନେତା ଓ ମନ୍ତ୍ରୀଙ୍କ ନିକଟରେ ଅଭିଯୋଗ କରି ଆସୁଅଛନ୍ତି, ହେଲେ ଏଥିପ୍ରତି କର୍ଣ୍ଣପାତ ନକରିବା ନିର୍ଲଜ ପଣିଆ ନୁହେଁ ତ ଆଉ କ’ଣ ? ଯଦି ରାସ୍ତା ପ୍ରତି ପ୍ରଶାସନ, ନେତା କି ବିଭାଗୀୟ ମନ୍ତ୍ରୀ ଧ୍ୟାନ ନ ଦିଅନ୍ତି, ଆଗାମୀ ଦିନରେ ଜନଆନ୍ଦୋଳନ ସୃଷ୍ଟି ହେବାର ଆଶଙ୍କା ନିଶ୍ଚୟ ରହିଛି, ସେଥିପାଇଁ ପ୍ରଶାସନ, ନେତା ଓ ବିଭାଗୀୟ ମନ୍ତ୍ରୀ ହିଁ ଦାୟୀ ରହିବେ ଵୋଲି ଜନସାଧାରଣଙ୍କ ଠାରୁ ଖବର ସଂଗ୍ରହରୁ ଜଣାପଡିଛି । ବିଶେଷକରି ଖଇରା ବ୍ଲକ ରାସ୍ତା ପ୍ରତି ଅଧିକ ଗୁରୁତ୍ଵ ଦେବା ଜରୁରୀ ହୋଇ ପଡିଛି । ତେଣୁ ବିଳମ୍ବ ନକରି ତୁରନ୍ତ ନିର୍ମାଣ ଓ ମରାମତି ପାଇଁ ସବୁ ମହଲକୁ ନିବେଦନ କରିଛନ୍ତି ଜନସାଧାରଣ ।।
ବାଲେଶ୍ଵରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
