ଜୟ ଜଗନ୍ନାଥ
ସୁରେନ୍ଦ୍ର କୁମାର ବେହେରା
ଅନାଥର ନାଥ ଆହେ ଜଗନ୍ନାଥ
ଆରତ ନାଶନ ହରି
ସକଳ ଜୀବଙ୍କୁ ପାଳନ କରୁଛ
ଦେଇ ତୁମ କୃପା ବାରି ।1।
ଅଗତିର ଗତି ପ୍ରଭୁ ଲକ୍ଷ୍ମୀପତି
ଭକତ ଜୀଵ ଜୀବନ
ପତିତ ତାରଣେ ପୁଣ୍ୟ ନୀଳାଚଳେ
ତୁମେ ପତିତପାବନ ।2।
ରତ୍ନ ସିଂହାସନେ ବସିଛ ମଉନେ
ଭାଇ ଭଉଣୀକୁ ଧରି
ବାରମାସେ ତେର ଜାତ ଭିଆଇଛ
ସବୁଦିନେ ହସେ ପୁରୀ ।3।
ମହୋଦଧି କୂଳେ କଳ୍ପବଟ ମୂଳେ
କର ମାନବୀୟ ଲୀଳା
ତୁମରି ପ୍ରେମରେ ଭକତ ବିଭୋର
ଭକ୍ତ ବନ୍ଧୁ ଚକାଡୋଳା ।4।
ତୁମପାଇଁ ଖଞ୍ଜା ଷାଠିଏ ପଉଟି
କେତେ ନୀତିକାନ୍ତି ପୂଜା
ତୁମ ନିକଟରେ ସଭିଏଁ ସମାନ
ଚଣ୍ଡାଳ ହେଉକି ରାଜା ।5।
ଆନନ୍ଦ ବଜାରେ ଭକ୍ତଜନ ପାଇଁ
ତୁମରି ମହାପ୍ରସାଦ
ଅବଢ଼ା ଡାଲିକୁ ବେଶର ମହୁର
ଭକତ ଖାଇ ଆନନ୍ଦ ।6।
ତୁମ ଘୋଷଯାତ ଜଗତେ ବିଦିତ
ରଥଯାତ୍ରା ଭକ୍ତ ପାଇଁ
ଦେଶ ବିଦେଶରୁ ମୁକତି ଆଶାରେ
ଭକତ ଆସନ୍ତି ଧାଇଁ ।7।
ରଥରେ ବାମନ ବେଶରେ ଦର୍ଶନ
କରିଲେ ମିଳେ ମୁକତି
ପାପତାପ ହର ଭକତ ଜନର
ଅଶାନ୍ତିରୁ ମିଳେ ଶାନ୍ତି ।8।
ଭାବର ଠାକୁର ବାରେ ଦୟାକର
ହେପ୍ରଭୁ କଳାଶ୍ରୀମୁଖ
ଆରତ ନାଶନ ଘେନ ନିବେଦନ
ହରିବ ସକଳ ଦୁଃଖ ।9।
ସୁରେନ୍ଦ୍ର କୁମାର ବେହେରା
ଜିତିପୁର ,ହରିପୁର ହାଟ ,ଯାଜପୁର
