ଅଧର୍ମର ବିନାଶ

                        ନବ କୁମାର ଦାସ

ଶୀତ ସକାଳର କଅଁଳ ଖରା, ସିଧା ପଡିଥାଏ ଦାଣ୍ଡ ପିଣ୍ଡା ଉପରେ l ପିଣ୍ଡା ଉପରେ ଠୁଙ୍ଗୁରି ବୁଢ଼ୀ ଟା ଖରା ଆଡକୁ ପିଠି କରି ବସିଥାଏ l ପ୍ରବଳ ଶୀତରେ ଯେମିତି ଥରୁଥାଏ ସେମିତି ପାକୁଆ ପାଟିରେ ବଡ଼ ନାତୁଣୀ ମୀରାକୁ ଡାକୁଥାଏ l ଲୋ ମୀରା କୁଆଡେ ଗଲୁ ଲୋ ମାଆ l ସତରେ ଯେମିତି ସବୁ ସ୍ନେହର ଗୋଟିଏ ମାତ୍ର ସାଗର ଏଇ ବୁଢ଼ୀ ମାଆ l ନାତୁଣୀ ଦୁଇଜଣ ମୀରା ଆଉ ରାଧା l କେଉଁ ଏକ ରହିଜଳା ଅଜଣା ରୋଗ ସେମାନଙ୍କ ମାଆ କୁ ସେମାନଙ୍କଠାରୁ ଛଡେଇ ନେଇଛି l ସେହି ଦିନଠାରୁ ବୁଢୀମା ହିଁ ପିଲା ଦୁଇଟାର ଯତ୍ନ ନେଇଛି, ବହୁତ ଆଦରରେ ବଢ଼ାଇଛି l ବୁଢ଼ୀ ମାଆ ମୀରାକୁ ଡାକିବା କ୍ଷଣି ମୀରା ଆସି ପହଞ୍ଚିଗଲା l ବୁଢ଼ୀ ଥରି ଥରି କହିଲା ମାଆ ରେ ବାପ ତୋର ଆଖି ମଳିଚିଆ ସକାଳରୁ ବିଲକୁ ବାହାରି ଗଲାଣି l ହେମରେ ଦେହ ହାତ ତାର ଥରି ଯାଉଥିବ l ଭୋକରେ ପେଟ ପିଠି ସମାନ ହେଇ ଯାଉଥିବ l ଯା ଲୋ ଯା କିଛି ଖାଇବା ନେଇଯା l ଆଉ ଗଲାବେଳେ ବାଡ଼ି ପଟ କବାଟ କିଳି ଦେଇଯା l ଏହାପରେ ମୀରା କହିଲା ହଉ ମା ମୁଁ ଯାଉଛି l

   ଏହାପରେ ମୀରା ତା ସାନ ଭଉଣୀ ରାଧାକୁ କିଛି ଖାଇବାକୁ ଦେଇ ବିଲକୁ ବାହାରି ଗଲା l ବାପା ଙ୍କ ପାଇଁ ମୁଢି ସହିତ ପିଆଜ ଆଉ ଆମ୍ବୁଲ ଚଟଣି କରି ନେଇଗଲା l ବାପାଙ୍କୁ ଜୋର ଭୋକ ଲାଗି ଯାଇଥିବ ଭାବି ସଅଳ ସଅଳ ଚାଲିବା ଆରମ୍ଭ କଲା l କିଛି ସମୟ ପରେ ବିଲରେ ପହଞ୍ଚି ଗଲା l ମାଘ ମାସର ବାଘୁଆ ଶୀତ ଟା ଜୋର ଧରିଥାଏ , ସେଥିପାଇଁ ଆଖ ପାଖ ବିଲକୁ ଲୋକ ସେତେ ସକାଳୁ ଆସି ନଥାନ୍ତି l ମୀରା ଯାଇ ଦେଖିଲା ବାପା ବିଲରେ ନାହାନ୍ତି l ଇଆଡ଼େ ସିଆଡେ ଚାହିଁଲା ହେଲେ ବାପାଙ୍କୁ ଦେଖିବାକୁ ପାଇଲା ନାହିଁ l ଏହାପରେ ବିଲର ଶେଷ ମୁଣ୍ଡକୁ ଦେଖିଲା ବାପା ହିଡ଼ ଉପରେ ଶୋଇଛନ୍ତି l ଦେହ ଟିକେ ଟିକେ ନୀଳ ପଡ଼ିଗଲାଣି l ଚେତା ନଥାଏ l ଖାଲି ନାକ ପୁଡାରୁ ପବନ ସୁଁ ସୁଁ କରୁଥାଏ l ବିଚାରି ଝିଅଟି କ’ଣ କରିବ ! ପାଖରେ କେହିବି ନଥାନ୍ତି l ମନ ଦୁଃଖରେ କାନ୍ଦି କାନ୍ଦି ପୁଣି ଘରକୁ ଦୌଡିଲା l ଘରକୁ ଯାଇ ବୁଢ଼ୀ ମାଆକୁ ସବୁ କଥା କହିଲା l ବୁଢ଼ୀ ମାଆ ତ ପୁରୁଣା କାଳିଆ ଲୋକ l ମୀରା ର କଥାକୁ ଠଉରେଇ ନେଲା ଆଉ ଭୋ ଭୋ ହେଇ କାନ୍ଦିଲା l ଗଳା ଫଟାଇ କାନ୍ଦିଲା ଓ କହିଲା ମୋ ପୁଅକୁ କେହି ବଞ୍ଚାଅ ରେ , କେହି ସାପ ଫାପ ତାକୁ କାମୁଡି ଦେଇଛି ରେ l କ୍ରନ୍ଦନର କରୁଣ ଚିତ୍କାର,ଯେମିତି ଦୁଃଖ ସବୁ ସେଇଠି ଛିଡି ପଡିଛି କଳା ମେଘ ହେଇ l ଏହାପରେ ସବୁ ଲୋକ ବୁଢ଼ୀର ଚିତ୍କାର ଶୁଣି ଦଉଡି ଆସିଲେ ପୁଣି କାନ୍ଦିବାର କାରଣ ଶୁଣି ବିଲକୁ ଧାଇଁ ଗଲେ l ଯାଇ ଦେଖିଲେ – ମୀରାର ବାପା ଗୋପାଳ ଚନ୍ଦ୍ର ଆଉ ନାହିଁ l ପାଟିରୁ ଗରଳ ବାହାରି ଆସିଥାଏ l ସମସ୍ତେ ବୁଝି ନେଲେ – ଅମାନିଆ ସାପର ଚୋଟରେ ଅମାନିଆ ପବନର ଗତି ବନ୍ଦ ହେଇ ଯାଇଛି l ଗୋପାଳ ଚନ୍ଦ୍ର ଆଉ ନାହିଁ l ସେମାନେ ଘରକୁ ଗୋପାଳର ଶବ ନେଇ ଆସିଲେ l ହେଲେ ବୁଢ଼ୀ ପାଖରେ ସମସ୍ତେ ଚୁପ l କାହାରି ପାଟିରୁ ଶବ୍ଦ ବାହାରୁ ନଥାଏ l ବୁଢ଼ୀ ସବୁ ବୁଝି ନେଲା l ତାକୁ ଆଉ ସମ୍ଭାଳେ କିଏ ? ଛୁଆ ଦୁଇଟାକୁ ସମ୍ଭାଳେ କିଏ l କାନ୍ଦି କାନ୍ଦି ବୁଢ଼ୀର ଧୈର୍ଯ୍ୟ ନଥାଏ ଛୁଆ ଦିଇଟା କାନ୍ଦି କାନ୍ଦି ନୟାନ୍ତ l ପିଲାଦିନୁ ମାକୁ ଖାଇଥିଲେ ଆଜି ବାପା ର ପାଳି l ଏହାପରେ କଥା ଯାଇ ପଡିଲା ସରପଞ୍ଚ ମଦନ ମଙ୍ଗରାଜ କାନରେ l ଲୋକ ଦେଖାଣିଆ ଭାବନାର ସହିତ ଦଉଡି ଆସିଲା l ଛୁଆ ଦୁଇଟାକୁ କୋଳେଇ ନେଲା, ବୁଢ଼ୀ ମାଆକୁ ସାନ୍ତ୍ୱନା ଦେଲା l ସତରେ ଯେମିତି କେଉଁ ଏକ ଯୁଗଜନ୍ମା ସେଇଠି ଜନ୍ମ ନେଇଛି ଲୋକଙ୍କ ସେବା ପାଇଁ l

   ଲୋକେ ତ ଜାଣନ୍ତି l ହଁ ହଁ ଲୋକେ ସବୁ ଜାଣନ୍ତି ମଦନ ମଙ୍ଗରାଜ କେଉଁ ନାବର ନାବିକ l ସ୍ୱାର୍ଥର ମଙ୍ଗକୁ ସେ ଭଲକି ଧରେ l ଯେ ପର୍ଯ୍ୟନ୍ତ ଜିରାରୁ ଶିରା ନ ବାହାରିଛି ସେ ଛାଡ଼ିବା ଲୋକ ନୁହେଁ l ନିଜ ସ୍ୱାର୍ଥର ପରମ ଦେବତା ସେ l ଅର୍ଥ ବଳ, ବାହୁବଳ ରେ ସେ ସେଠାକାର ସରପଞ୍ଚ l ଲୋକେ ତ ଛି ଛାକର କରନ୍ତି , କୁହନ୍ତି କି କେବେ କି ପାପ କରିଥିଲେ ଆମେ ଏପରି ସରପଞ୍ଚ ଆମରି ଭାଗ୍ୟରେ ଆସିଲା l ସେ ଯାହାବି ହେଉ ଆଜି ସେହି ସରପଞ୍ଚ ଠାରେ ନୈତିକତାର ଲକ୍ଷଣ ଦେଖି ସମସ୍ତେ ଆଶ୍ଚର୍ଯ୍ୟ l

  ସମୟର ସ୍ରୋତ ସବୁ ଭସେଇ ନେବ l ଯିଏ ଏଠାକୁ ଆସିଛି ସେ ନିଶ୍ଚୟ ଯିବ l ଏମିତି ମୀରା ବାପାର ଶୁଦ୍ଧି କ୍ରିୟା ସରିଲା l ଏହାପରେ ସରପଞ୍ଚ ଝିଅ ଦୁଇଟି ର ପାଠପଢା ଦାୟିତ୍ୱ ତୁଲାଇବ ବୋଲି କହିଛି l କେଜାଣି ସମୟ ସବୁ କହିବ ଲୋକଙ୍କ ମୁଖର ଭାଷା ସରପଞ୍ଚଙ୍କ କାର୍ଯ୍ୟରେ l ଏପଟେ ବୁଢ଼ୀର ସମୟ ସରି ଆସିଲାଣି l ପୁଅକୁ ଝୁରି ଝୁରି ଆହୁରି ଦୁର୍ବଳ ହେଇଗଲାଣି l ନାତୁଣୀଙ୍କ ଭବିଷ୍ୟତ କଥା ଭାବିଲା ବେଳକୁ ତା ମୁଣ୍ଡ କାମ କରୁନି l ନାତୁଣୀ ଦୁଇଜଣ ଭଲ ପଢୁ ଥାନ୍ତି l ବଡ଼ ନାତୁଣୀ ମୀରା ଦଶମ ଶ୍ରେଣୀରେ ପଢୁଛି ସାନ ଟା ସପ୍ତମ ଶ୍ରେଣୀରେ l ବାପା, ମାଆ ଥିଲେ ଆଜି ବହୁତ ଖୁସି ହୋଇଥାନ୍ତେ l ଝିଅ ଦୁଇଟା ତାଙ୍କର ଜଗତ ଜିତା l ରୂପରେ ଯେମିତି ଗୁଣରେ ସେମିତି, ପାଠରେ ବି ଆହୁରି ଭଲ l ଦଇବ ତ ଦାଉ ସାଧିଛି l କାଳ ଆସି ଦୁଆର ପାଖରେ ହାଜର , ବୁଢ଼ୀର ନିଃଶ୍ୱାସ ବନ୍ଦ ହେବାକୁ ଲାଗିଲାନି l ଏଇତ ନାତୁଣୀ ଦୁଇଜଣ ମୁଣ୍ଡ ବାଡେଇ କାନ୍ଦିଲେଣି l ଦେଖ ଦେଖ ବୁଢ଼ୀ ଟା ବି ଚାଲିଗଲା l ସବୁ ସରିଗଲା l ଗୋଟେ ସଂସାର ଭାସିଗଲା l

      ବାସ ବଢିଆ ହେଲା, ଏହି ସୁଯୋଗ ତ ଖୋଜୁଥିଲା ମଦନ ସରପଞ୍ଚ l ଏବେ ସେମାନଙ୍କ କେହି ନାହିଁ ତାକୁ ପ୍ରତିବାଦ କରିବ କିଏ l ସରକାରୀ ଘର ଯୋଗେଇଦେବା ଆଶାରେ କାଗଜ ପତ୍ର ପ୍ରସ୍ତୁତ କଲା l ଘର ବି ଆସିଲା ହେଲେ କାଗଜ ଦେହରେ ମାଟି, ବାଲି, ଇଟା, ସିମେଣ୍ଟର ଘର ରହିଗଲା l ସରପଞ୍ଚ ସେ କଥା କାହାକୁ ଜଣେଇଲା ନାହିଁ lସବୁ ଟଙ୍କା ଖାଇଦେଲା l ଝିଅ ଦୁଇଟି କିଛି ଜାଣି ପାରୁ ନଥିଲେ , ଜାଣିଲେ ବା କରିବେ କଣ ? କଷ୍ଟେମଷ୍ଟେ ସେମାନେ ଚାଲୁଥାନ୍ତି l ସରକାରୀ ସୁବିଧା କହିଲେ ବାପା ମା ନଥିବାରୁ ମାସକୁ 2000 ଟଙ୍କା ପାଆନ୍ତି l ହେଲେ ସେଥିରେ କଣ ଦୁଇଟା ପ୍ରାଣୀ ଚଳି ପାରିବେ ? ତିଅଣ କୁ ଲୁଣ ନିଅଣ୍ଟ ପୁଣି ଦେହ ରୋଗ ବିରହ କଥା ଅଛି ନା’ l ସେ ବର୍ଷ ମୀରା ଦଶମ ଶ୍ରେଣୀ ପରୀକ୍ଷା ଦେଇଥିଲା l ପରୀକ୍ଷା ଫଳ ପ୍ରକାଶ ପାଇବା ପରେ ସେ ରାଜ୍ୟର ପ୍ରଥମ ସ୍ଥାନ ହାସଲ କରିଛି ବୋଲି ଜଣା ପଡିଲା l ସବୁଆଡୁ ଶୁଭେଚ୍ଛାର ସୁଅ ଫିଟିଲା l ସରପଞ୍ଚ ବି ଫୁଲତୋଡ଼ା ଟିଏ ଦେଇ 5000 ଟଙ୍କା ପୁରସ୍କାର ଘୋଷଣା କଲା l ସମସ୍ତେ ଏହା ଦେଖି ଖୁସି ହେଲେ l ଆମ ସରପଞ୍ଚ ସୁଧୁରି ଗଲାକି ? ଲୋକ ତୁଣ୍ଡରେ ଏହି କଥା l

       ଏହି ସମୟ ଅବସରରେ ମଦନ ସରପଞ୍ଚ ଦୁଇ ଭଉଣୀକୁ କହିଲା – ମାଆ ରେ ତମର ସରକାରୀ ଘର ଆସି ଯାଇଛି l କିନ୍ତୁ ସେତିକି ଟଙ୍କାରେ ଘର ସମ୍ପୂର୍ଣ ନୁହେଁ l ତେଣୁ କଣ ଗୋଟେ କରିବାକୁ ପଡିବ ଘର ସମ୍ପୂର୍ଣ ହେବା ପାଇଁ l ଝିଅ ଦି’ ଜଣ କହିଲେ ଆପଣତ ଆମର ସବୁ କଥା ବୁଝୁଛନ୍ତି, ତେଣୁ ଆପଣ କିଛି ବ୍ୟବସ୍ଥା କରନ୍ତୁ l ଏଣୁ ସରପଞ୍ଚ କିଛି କାଗଜ ପତ୍ର ପ୍ରସ୍ତୁତ କରି ଆଣି ଥାଏ , ଝିଅ ମାନଙ୍କ ଠାରୁ ଦସ୍ତଖତ କରି ନେଲା l ସେମାନଙ୍କର ଗୋଟିଏ ଏକର ଜମିକୁ ହଡପ କରି ନେଇ ନିଜ ନାମରେ କରି ନେଲା l

     କଷ୍ଟେ ମଷ୍ଟେ ଦୁଇ ଭଉଣୀର ପଢ଼ା ଚାଲିଥାଏ l ମୀରାର ଲକ୍ଷ୍ୟ IPS ଅଫିସର ହେବ l କିନ୍ତୁ ଟଙ୍କା ନାହିଁ କଣ କରିବ ? ସେ ଭାବିଲା ଏବେ ତ କେହି ଚାଷ କରିବା ପାଇଁ ନାହାନ୍ତି, ବାପାଙ୍କ ସେହି ଜମି ଖଣ୍ଡକ ରଖି ଆଉ ଲାଭ କ’ଣ ତେଣୁ ଦୁଇ ଭଉଣୀ ଜମି ବିକିଦେବାକୁ ଯୋଜନା କଲେ l ପାଖ ପଡୋଶୀଙ୍କୁ ସବୁ କହିଲେ l ପଡୋଶୀ ଜଣଙ୍କ ଝିଅ ଦୁଇଜଣଙ୍କୁ ସାହାଯ୍ୟ କଲେ l କିନ୍ତୁ ଦେଖିଲା ବେଳକୁ ଜମି ଆଉ ନାହିଁ l ମଦନା ସରପଞ୍ଚ ସବୁ ହଡପ କରି ନେଇଛି l ଝିଅ ଦୁଇଟା କେତେ ଆଶା କରିଥିଲେ ପାଠ ପଢି ବଡ଼ ଅଫିସର ହେଇଥାନ୍ତେ l ସବୁ ଫସର ଫାଟିଗଲା l ଆଉ ସେ ସରପଞ୍ଚକୁ ସବୁ ଛି ଛାକର କଲେ l ଏମିତି ସରପଞ୍ଚକୁ ପାନେ ଦେବାକୁ ହେବ l ତେଣୁ ଗାଁ ଲୋକ ଯୋଜନା କଲେ l ଏଥି ପାଇଁ କଣ କରିବାକୁ ହେବ l ସମସ୍ତେ କହିଲେ ଆମେ ଏହି କାମ ଆମ ଝିଅ ମୀରା ମାଧ୍ୟମରେ କରିବା l ତେଣୁ ସମସ୍ତେ ମୀରାର ପାଠ ପଢ଼ା ପାଇଁ ଟଙ୍କା ଖର୍ଚ୍ଚ କଲେ l ଦୁଇ ଭଉଣୀ ଗାଁ ଲୋକଙ୍କ ସାହାଯ୍ୟ ଦେଖି ବହୁତ ଖୁସି ହେଲେ l

      ଏବେ ସମୟ ଆସି ଯାଇଛି l ମୀରା ସବୁ ପରୀକ୍ଷାରେ ଉତୀର୍ଣ୍ଣ ହେଇଛି l ଆଜି ସେ lPS ଅଫିସର ବନି ଯାଇଛି l ଗାଁ ଲୋକଙ୍କ ସୁଖ ଦୁଃଖରେ ସାଥି ହେଇଛି l ତାର ପ୍ରଥମ କାମ ମଦନା ସରପଞ୍ଚକୁ ଧରିବା l ଏଣୁ ମଦନା ସରପଞ୍ଚର ସମସ୍ତ ଜଟିଳ କାମର ପର୍ଦାଫାଶ କରାଇବାରେ ଗାଁ ଲୋକ ମାନେ ସାହାଯ୍ୟ କଲେ l ସରପଞ୍ଚର ଚାମଚା ଗିରିଧାରୀକୁ ଧରି ସବୁ ଧରା ପକଡ କଲେ l ଜଣା ପଡିଗଲା ସରପଞ୍ଚ ଗାଁକୁ ଆସୁଥିବା ସରକାରୀ ଘରର ଟଙ୍କା ସବୁକୁ କେମିତି ହଡପ କରିଛି l ତାଙ୍କ ଜମି କେମିତି ଛଡେଇ ନେଇଛି l ଏଣୁ lPS ଅଫିସର ମୀରାକୁ ଖୁବ ସହଜ ହେଲା ସରପଞ୍ଚକୁ ଏରେଷ୍ଟ କରିବାକୁ l ସେ ସେହା କଲା l ସରପଞ୍ଚର ଗାଦି ଗଲା l

      ଏଥର ଲୋକେ ସମସ୍ତେ ଖୁସି l ଝିଅ ଦୁଇଜଣ ବଡ଼ ମଣିଷ ହେଲେ ଆଉ ସୁଖ ଦୁଃଖର ସାଥି ହେଇ ରହିଲେ l ‘ତାପରେ ଲୋକେ କହିଲେ ଅଧର୍ମର ବିନାଶ ହେଇଛି l ‘

ସୁରଡ଼ିହା, ବାଲିଆପାଳ, ବାଲେଶ୍ୱର